小倉城係福岡縣北九州市內一座雄偉城堡。每逢春季，城內都會有約300株櫻花盛開、秋季則有紅葉美景，隨著四季更迭，遊客可以在此欣賞到截然不同嘅季節景色。
小倉城推薦看點
小倉城嘅天守閣採用名為「唐造」嘅建築模式，築城當時係日本全國唯一採用呢種方式嘅少見稀有城堡。「唐造」即係指上層比下層寬大及突出，所以小倉城嘅五樓部分係起得比四樓大㗎！
鑑賞小倉城建築美
小倉城被護城河同石牆環繞，進城後您首先會經過名為「大手門」嘅堅固石牆大門。通過大手門後，前方就矗立著五層樓高建築嘅雄偉小倉城。
遊客可進入小倉城內逐層參觀，一樓有播放介紹小倉城歷史影片嘅放映室，二至四樓展出咗歷史文物資料同武器等器具，五樓則有可以眺望市區景色嘅展望區。
此外，小倉城東側嘅「小倉城庭園」都唔可以錯過。庭園內有池塘、四季花草樹木，由欣欣向榮嘅日本庭園同傳統建築物聯手打造日本風情畫供民眾參觀，非常推薦順便到此一遊喔！
小倉城傳統祭典
小倉城內唔同季節都會有唔同祭典舉行，例如3月底至4月頭櫻花盛開季節期間，就會有「小倉城櫻花祭」於天守閣前嘅廣場舉辦。到時唔只有多間美食攤檔，仲會有歌舞表演呢！此外，10月中旬嘅「小倉城祭」亦同樣有美食攤檔林立，以及舞蹈同鄉土技藝等表演或茶會活動。
知名賞花及影相景點
嚟到小倉城，您可以欣賞到自然景觀同特別展覽，當然唔少得適合影相打卡呃LIKE嘅景點啦！
櫻花及紅葉等自然美景
小倉城係欣賞櫻花同紅葉嘅名勝景點。春季有約300株櫻花盛開，將附近一帶染成一片粉紅，尤其白色石牆同雄偉城堡與櫻花交織而成嘅風景相當唯美動人。
入秋後，則有欅樹或銀杏樹葉轉紅或轉黃，為小倉城周遭增添色彩。期間內推薦到「小倉城庭園」欣賞到色彩鮮豔嘅紅葉美景。
與劍豪對決！不容錯過嘅影相景點
小倉城三樓設有展覽，展出與小倉甚有淵源嘅劍豪「宮本武藏」同「佐佐木小次郎」嘅相關資料。場內重現出兩人決鬥場景嘅影相背板，可以影出同等身大嘅宮本武藏對決嘅相，當係為旅途留下精彩嘅紀念都唔錯呀。
大受外國旅客歡迎嘅體驗活動
小倉城一樓設有體驗專區，歡迎遊客喺重現江戶時代城下町風貌嘅地方體驗當時歷史文化。
變裝體驗
換上武士鎧甲、忍者服裝或和服等衣物，漫步於江戶時代城下町，最適合鍾意日本傳統服飾嘅您影相留念！
競技遊戲體驗
小倉城內亦設有體驗日本傳統騎射武術「流鏑馬」嘅專區。「流鏑馬」係日本武士嘅傳統競技，意即武士騎喺馬背上時一邊騎馬奔馳，一邊朝向標靶射箭。遊客可以喺馬模型上，體驗望住電視畫面挑戰射靶遊戲！
關於小倉城
- 建立年份：西元1602年（西元1959年 重建）
- 祭典：小倉城櫻花祭：3月底至4月頭嘅週末、小倉城祭：10月中嘅週末
景點資訊
- 名稱：小倉城
- 地址：〒803-0813 北九州市小倉北區城內2-1
- 交通方式：距離小倉站徒步約20分鐘
- Wi-Fi：有提供（Kitakyushu City Free Wi-Fi）
- 語言對應：中文、英文、韓文
- 購票方式：於入口處購票
- 可否使用信用卡：不可
Comments