萩市位於山口縣北部，三面環山、面向日本海。被大海、河川、山林環繞，自然環境豐富。除咗風景秀麗嘅山海景觀，仲有好多值得一睇嘅景點，例如係保存完善嘅城下町街區等。另外，一整年都可以食到各種新鮮海產及農產品，當地美食款式都非常豐富。
關於山口縣萩市
萩除咗面向日本海嘅市區及其周邊地區外，大部分都係山地及丘陵地帶。另外，萩市嘅外海有「見島」等多個離島。
萩市建於17世紀初期、萩城繁榮嘅城下町（以領主城堡為中心向外發展嘅城市地帶）以傳統工藝品「萩燒」而聞名。
萩各區觀光必去景點
萩嘅觀光區，分為「萩」、「川上及旭」、「MUTSUMI及福榮」、「田萬川及須佐」四個地區。以下為要為大家介紹各區觀光嘅必去景點。
萩市
「萩」指嘅係以JR萩站周圍嘅萩城跡城下町作為中心嘅區域。完整保存咗好多武將嘅住宅（武家屋敷）、商家等傳統建築物。另外，仲有好多同萩出身嘅偉人相關嘅神社寺廟、歷史建築等景點，例如松陰神社，主要祭祀活躍於19世紀嘅教育家及思想家，被稱為學問之神嘅吉田松陰。另外，當地仲有多間萩燒嘅展示館，觀光之餘可以順便參觀。
另外，為咗鑄造大砲而建嘅金屬溶解爐「萩反射爐」及曾經製造洋式軍艦嘅「惠美須鼻造船所跡」等產業遺產都係必去景點。
川上及旭地區
萩市南部係川上及旭地區，景點主要位於山中溪谷、農村聚落，例如被列為日本國家名勝嘅溪谷——長門峽。四季都有美景可以欣賞得到，特別係秋季，滿山嘅紅葉與瀑布、各種形狀嘅岩石、橋梁交織成色彩繽紛嘅美景。另外，佐佐並市地區保留咗17世紀驛站嘅模樣，到處都可以睇到紅瓦屋頂嘅傳統建築。
MUTSUMI及福榮地區
萩嘅市中心係MUTSUMI（むつみ）及福榮地區。 有大板山TATARA製鐵遺跡（大板山たたら製鐵遺跡）、河川及田園等美景。其中，高低差約15米嘅扇子落瀑布，夏季有22萬株向日葵盛開嘅壯觀MUTSUMI向日葵大道都係知名景點。
田萬川及須佐地區
萩市北部就有田萬川及須佐地區，沿海有各種觀光名勝。其中必睇嘅須佐角頁岩係陡峭嘅懸崖岩壁上呈現黑色及淡灰色條紋嘅岩石。奇形怪狀嘅岩石沿著海岸延伸，形成壯麗嘅景觀。如果搭須佐灣嘅觀光船，更加可以近距離觀賞望到壯觀嘅岩石。
見島地區
見島係一個距離萩市西北約45公里、四面環島嘅小島。島上有好多魅力景點，例如北燈塔、美麗嘅日落日出景色、同祭祀觀音菩薩嘅觀音崎等等。
從萩市搭高速船，約1小時10分鐘即抵達見島，嚟到萩市玩考慮吓加入行程啦！
萩嘅當地美食
萩嘅美食，以甘鯛、海膽、劍先烏賊等海鮮、見蘭牛及MUTSUMI 豬肉（むつみ豚）特別出名。萩地區有多間餐廳可以食到呢啲美味嘅當地料理。另外，喺每個地區嘅公路休息站（道の駅），唔單止可以用餐，仲可以買到萩嘅當地特產手信。
萩嘅住宿
大部分住宿設施集中於萩市地區。有各式各樣嘅住宿，例如可以俯瞰城下町嘅住宿、從客房或溫泉浴池可以眺望日本海景色嘅旅館、以美味料理為特色嘅民宿。另外，有多間經濟型旅館，住宿一晚唔使1萬円，如果想慳啲，推薦喺萩市地區搵啱心水嘅住宿。（2019年7月資料）
其他地區嘅住宿設施相對較少，但沿著田萬川及須佐地區嘅海岸一帶都有一啲小型旅館及民宿。
去萩市嘅交通
想去萩市觀光可以先去JR東萩站。從JR新山口站乘搭Super Hagi號高速巴士（スーパーはぎ号），車程約1小時10分鐘。去到搭巴士就可以到周圍附近各景點。另外，JR東萩站有觀光諮詢中心協助遊客。
景點資訊
- 名稱：萩（JR東萩站）
- 地址：山口縣萩市大字椿東字大廣津2997
- 交通：新山口站→[Super Hagi號高速巴士（スーパーはぎ号）] 約1小時10分鐘
- Wi-Fi：有提供（HAGI FREE Wi-Fi）
- 語言對應：中文、英文、韓文、法文
- 可使用信用卡：VISA、MasterCard、JCB、AMERICAN EXPRESS、Diners Club International
Comments