福士蒼汰主演嘅溫馨感人電影《旅貓日記》，去年上畫，將要發行藍光碟同DVD。原著作者係知名作家有川浩。有川好多出名作品都有改編成電影，包括《圖書館戰爭》、《植物圖鑑》等。而今次佢筆下就寫出溫柔青年宮脇悟同傲嬌小貓奈奈嘅感人故事，一人一貓之間交織出跨越語言嘅深厚牽絆。
故事講述原本係流浪貓嘅奈奈（配音：高畑充希），因為交通意外被愛貓青年宮脇悟（福士蒼汰飾）所救。被宮脇悟收留之後，奈奈就過著幸福嘅家貓生活。但係，因某些緣令宮脇悟無法再繼續照顧奈奈，於是宮脇帶住奈奈陸續去拜訪小學時期嘅好朋友、高中嘅同學嘅夫妻倆，同埋自己阿姨，為咗幫奈奈尋覓新主人（奴隸？）而踏上旅途。
喺拍攝過程入面，福士蒼汰同奈奈朝夕相對，原本係狗派嘅佢竟變成愛貓嘅貓奴，完全被小貓奈奈嘅魅力征服咗。喺今次嘅訪問入面，一人一貓久違5個月再次相見，即使被成班採訪記者包圍，都仍然公開咁親暱擁抱，上演好似電影入面嘅欲拒還迎、時而深情凝望嘅戲碼，毫無顧忌咁自然交流相處。福士蒼汰斬釘截鐵咁表示佢對奈奈嘅愛，話喺貓咪入面，奈奈係最好。今次專訪，福士蒼汰回顧咗對呢部無可取代嘅作品嘅諗法。
――今日係您同奈奈嘅久違重逢？
係啊，我地成5個月無見。奈奈畀我嘅印象仲係同以前一樣，乜都無變（笑）。奈奈真係一隻好自由自在嘅貓咪。
――喺幕後花絮嘅影片入面，您曾經講過話「遇見奈奈之後，就變成貓奴」，關於呢點，到而家都有無變？
係啊。無變啊。因為演出咗呢部電影，令我徹底了解到貓咪嘅可愛同埋魅力。貓咪真係很可愛呢…啊！講起呢樣嘢，我之前第一次去咗貓咪咖啡廳！雖然係朋友找我一齊去，但我玩得好開心。真係有好多貓咪，啊，我講咗廢話（笑）。
――接觸咗咁多貓咪之後，您仲係覺得奈奈係最好嘅貓咪嗎？
奈奈雖然都會有任性嘅部分，但我唔在意，對我嚟講佢係最特別嘅！佢亦都係同我一齊拍攝工作嘅好夥伴，我覺得如果無奈奈嘅話，就拍唔成呢齣電影。仲有就係，奈奈嘅外表都係最好最可愛嘅。
――喺電影拍攝嘅時候，有許多場景都需要等貓咪進入拍攝狀態，或者要令佢牠專注亦有一定難度。關於同動物一齊拍攝嘅樂趣同困難，您有乜嘢感想呢？
的確，同一般嘅拍攝工作完全唔同。拍攝貓咪嘅工作有佢獨特嘅難處。但今次嘅拍攝過程入面，我好了解自己好鍾意呢個部份。我好鍾意為咗一啲野去努力，覺得咁樣可以提升自己嘅能力。今次大家都係抱住「為咗奈奈」嘅心情去拍攝，雖然我係主演，但心情上嚟講，反而覺得咁樣可以較為輕鬆咁去演出。
――喺呢部電影入面，令您印象最深刻嘅場景係？
唔知點解，奈奈黏喺我身上嘅瞬間，相當令我印象深刻。就係郵輪上嗰場、仲有沖涼嗰場戲。係沖涼嗰場戲，成身都係泡泡嘅奈奈黏上來之後，自己都變到成身都係身泡。平時唔太鍾意俾人抱嘅奈奈，緊緊抓住我唔放，「奈奈有啲驚沖涼呢～」嗰刻真係覺得可愛到不得了。
――另外，係咪有一啲場景拍出來嘅效果，亦令您驚嘆？
我睇咗奈奈仲係流浪貓嗰幾場戲，好感動。我了解嘅係家貓時期嘅奈奈，所以睇到奈奈嘅另外一面，不禁令我感觸當時嘅奈奈好努力咁生活！拍攝嘅時候亦都一樣，會擔心奈奈同其他貓咪一齊，唔知道相處有無事之類。完全喺由父母嘅角度出發關心咁（笑）
――相信你身邊嘅朋友或者家人都已經欣賞過『旅貓日記』呢部戲，唔知大家對電影嘅感想，有無啲令你好深刻嘅呢？
聽咗好多人嘅感想，感覺呢部作品比較可以感動有養貓養寵物嘅觀眾嘅心。聽咗大家嘅感想之後，令我再次體會到，動物同人類之間嘅愛情唔係稀有。「將佢當寵物嚟養」呢件事，其實有一部份係人類自己自說自話，但當中亦包括咗人對寵物嘅愛情，亦都會有寵物回應主人感情嘅例子，兩者之間進而就可以衍生出更多愛情。又係人又係動物，呢兩者之間好似一樣，又好似唔一樣，關係絕妙。野生動物同人類之間就完全唔同咗，我諗寵物係喺中間一個值得感恩嘅存在。
――您以前嘅屋企曾經養過狗。想請問您有無經驗係發生咗啲唔同得屋企人講嘅野，但有剩係講俾狗狗聽，只要同寵物一齊就令人感到安心嘅狀況呢？
當然有。只要有養過寵物嘅人，無論係邊個都會遇過吧！屋企嘅狗大概由小學養到高中左右，或者單純只係人類一廂情願，但總覺得佢會聽我講嘢，仲聽得明…亦都有曾經對佢講咗好多嘢…
――講咗啲咩嘢呢？
例如今日喺學校發生咗乜野事之類…。講出嚟令人有啲難為情。（笑）
（採訪、撰文＝赤山恭子、攝影＝林孝典）
想睇更多福士蒼汰同奈奈嘅專訪照片，請參閱：https://filmaga.filmarks.com/articles/2711/
Comments