著名溫泉之鄉石川縣加賀市嘅推薦旅館

位於石川縣南西位置嘅加賀市，係以溫泉之鄉聞名嘅人氣觀光旅遊勝地。海鮮美食同當地特產品亦相當豐富，吸引好多旅客造訪。今次就要為大家介紹嚟到溫泉之鄉—石川縣加賀市觀光旅遊時推薦嘅精選旅館。

加賀嘅三個溫泉地區

加賀地區有三個溫泉區，分別係「片山津溫泉」、「山代溫泉」同「山中溫泉」，吸引咗好多去金澤觀光嘅遊客順道嚟浸溫泉。三個溫泉區各有唔同嘅歷史同文化，呢次要將焦點放喺位於山代溫泉嘅推薦旅館。

山代溫泉係因武將明智光秀喺呢度療傷而聞名嘅溫泉（明智光秀原本係織田信長嘅家臣，後成為打敗織田信長嘅武將）。喺江戶時代，大眾公共溫泉浴池「總湯」同附近嘅溫泉街甚至有「湯之曲輪」嘅特有稱呼，可想而知幾咁受歡迎。至今仍可以喺當時嘅「總湯」享受浸溫泉樂趣！

山代溫泉葉渡莉係以「木的溫暖、葉的溫和」作為主要概念嘅溫泉旅館。

有能感受體驗純正和風嘅日式客房，仲有室內附露天溫泉浴池或設有按摩椅嘅和室房，並且有單人房同洋室客房，可以根據喜好同需求挑選住宿房型。

引以為傲嘅溫泉大浴池分為天然檜木同石造兩種露天浴池，其他仲有可供付費預約嘅私人包場浴池。

晚餐提供每月更換餐單嘅宴席料理。堅持選用當地生產嘅食材，可以品嚐到使用咗大量當季嘅海鮮魚貝類同當造蔬菜所製成嘅日本料理。每逢秋冬仲會提供季節限定嘅加賀名產—螃蟹料理，讓遊客大飽食福！到加賀旅遊之際，相當推薦食當地新鮮美食呀！