昔日日本鎖國前，與中國、荷蘭、葡萄牙進行貿易往來嘅港口就係長崎嘅平戶島，而島上嘅平戶城更於2006年被選為日本百大名城之一。以下為你介紹平戶城現今作為觀光景點嘅魅力之處。
三面環海嘅長崎平戶城
平戶城係一座三面環海嘅日本城堡。由於城堡喺江戶時代建造，當時仲未有天守閣（日本城堡建築部份），但就建咗三層嘅乾櫓（亦係城堡建築之一）嚟代替。然而，同日本好多城堡一樣，因明治政府嘅政策，平戶城於1871年被拆除，只有狸櫓 （防御用嘅小城樓）同北虎口（出入口）被保留下來。目前睇到嘅天守閣同瞭望台等建築，實際上係1962年建成嘅。
長崎平戶城嘅特色之處
長崎平戶城嘅天守閣
平戶城從當初建城到廢城為止都未曾修建過「天守閣」。然而，平戶城喺1962年重建時，復原咗「櫓」（即防御用嘅小城樓）等城樓建築，亦建立咗模擬嘅天守閣。如果上到而家睇到嘅天守閣，視野會非常好，可以眺望平戶市街、平戶港海域嘅景色。另外，仲可以欣賞天守閣內珍貴嘅歷史文物，包括日本國家級重要文化財產之一、龜岡神社所藏嘅「環頭大刀」。對日本歷史或武將文化有興趣嘅人，一定要去呢個地方發掘一下！
環繞長崎平戶城嘅龜岡公園
龜岡神社原本係平戶城本丸御殿以前所在嘅位置，而周邊亦被開發成為龜岡公園。而連接公園西側嘅城下町街道與龜岡公園之間嘅「幸橋」，更被列為日本國家重要文化財產。另外，喺平戶城內有一條羅漢松嘅針葉樹林蔭大道，大樹嘅樹齡長達400年以上，被列為長崎縣天然紀念物。另外，仲可以一邊散步，一邊欣賞珍龜岡神社本殿前方嘅名水「根本水」等歷史遺跡。
長崎平戶城嘅「狸櫓傳說」
從江戶時代保存至今嘅「狸櫓」呢個城樓建築， 官方名稱為「多聞藏」，因為係同貉呢種動物有關嘅傳說，而中文「貉」喺日文漢字係「狸」（唔係狐狸呀），所以被稱為狸櫓。傳說有貉喺「櫓 」嘅地板下面住。但有一日，為咗維護櫓，剝哂所有地板。所以某日夜晚，貉化身成人，去到藩主床前，以永生永世守護平戶城作為條件，懇求藩主讓佢繼續住喺櫓嘅地板下。藩主接受咗呢個請求，並信守承諾鋪返地板。從此，平戶城嘅櫓就被稱為「狸櫓」。不過，目前我哋只可以喺門口望看板呈現可愛貉嘅圖像㗎咋。
去平戶城嘅交通方法
喺「たびら平戶口」站前巴士站乘搭往平戶棧橋方向嘅「西肥巴士」，車程約10分鐘，喺猶興館巴士站或市役所前巴士站落車後徒步約7至10分鐘就到平戶城。
景點資訊
- 名稱：平戶城
- 地址：〒859-5121 長崎縣平戶市岩之上町1458
- 交通方式：從松浦鐵道西九州線嘅「たびら平戶口」站前巴士站，乘搭「西肥巴士」約10分鐘，於猶興館巴士站或市役所前巴士站落車，徒步約7至10分鐘可抵達平戶城。
- 開放時間：08:30～17:30
- 入場費：大人510円、中學高中生300円、中學初中生及小學生200円
※2019年1月起，進行大規模整修，部分城樓目前關閉中。2019年10月起到2021年3月止，天守閣會因整修而閉館。
Comments