小松機場位於石川縣小松市，除咗提麻來往羽田機場等日本國內主要機場嘅國內線航班，仲有來往中國、韓國、台灣等嘅國際航線，而香港都喺今年中開通咗直達航班啦！仲要只需要約40分鐘就可以從小松機場去到有眾多觀光景點嘅金澤市，交通方便快捷。想去金澤旅行，話咁易呀！
小松機場的概覽
小松機場喺1961年啟用，係一棟位於小松市嘅3層建築。1樓為入境、離境大堂，2樓為餐廳及各式商店、3樓設有空曠嘅戶外觀景台，可以觀賞飛機升降。
另外，機場附近聚集各種觀光名勝，例如有加賀溫泉鄉，讓你可以短時間享受浸溫泉嘅設施，另亦設有可入住嘅溫泉住宿。
小松機場內有啲咩？
小松機場內有多間提供各種美食料理嘅餐廳，同埋賣各式石川當地紀念品嘅商鋪。因為設有國際線航班，為外國顧客提供周全嘅服務。
起飛前、到達後喺小松機場享用各種名產美食
無論出發前或抵達後，小松機場2樓嘅5間餐廳都可以幫到你醫肚。無咁肚餓可以揀輕食，或者揀日式料理、西式料理等食正餐都得。而當中特別推薦嘅餐廳係「RESTAURANT AIRPORT」。除咗提供以當地產新鮮蔬菜同海產所製作嘅定食套餐同海鮮丼等，仲提供金澤咖喱等當地名產美食添。想用盡每分每秒好好享受日本，連機場餐廳都唔可以放過呀！
最後衝刺買特產手信！
小松機場2樓有多間商品店，售各式各樣嘅當地手信。當中有賣以石川縣為首，附近其他縣出產嘅物品。想買具代表性嘅手信當然唔少得石川縣嘅傳統和菓子、限定發售嘅零食菓子、金箔製品、漆器等傳統工藝品應有盡有。旅行用品都有，落機有咩需要都即刻補充到！
另外，免税店內亦有賣各種商品。例如有日本產化妝品、電器、酒類、和菓子等食品，加埋石川縣傳統工藝品等，總共有約2,000種商品讓你慢慢揀！
專為外國人而設嘅便利服務
小松機場設有來往亞洲圈嘅國際航線，有唔少外國人到訪，所以有提供專為外國人而設嘅貼心服務。例如，1樓嘅觀光資訊站就設有中文、英文、韓文、泰文多語言對應嘅平板電腦，向外國人提供觀光旅遊及交通資訊等。
另外，有來往台北、首爾航班運行時更有識得講當地語言嘅工作人員解答旅客需要。
小松機場嘅交通資訊
小松機場為國際機場，從香港、台灣、中國、韓國都有直達航班運行。從日本其他國內地方飛過去都非常方便，從東京羽田機場都係1個鐘就到小松機場。至於去機場附近地方玩，最方便嘅就係搭機場巴士約40分鐘可到金澤市啦，非常方便快捷！
景點資訊
- 景點名稱：小松機場
- 地址：石川縣小松市浮柳町ヨ50
- 交通方式：搭40分鐘機場巴士到金澤市
- 是否提供Wi-Fi：有（Komatsu AP Free WiFi）
- 對應語言：中文、英文、韓文
- 可使用信用卡：VISA, MasterCard, JCB, AMERICAN EXPRESS, Diners Club International
Comments