奈良觀光絕對唔可以錯過嘅東大寺，最出名嘅就係安置咗大佛嘅大佛殿，亦係世界上最大嘅木造建築。東大寺正南面嘅「南大門」，高達25米，係號稱日本國內最大規模嘅山門。另外，法華堂、戒壇堂內亦有好多奈良時代嘅國寶佛像值得一睇。想仔細參觀東大寺嘅話，建議安排1至2個鐘咁去好好欣賞呀。
東大寺擁有悠久歷史
東大寺大佛殿內嘅大佛，簡直可謂奈良嘅象徵。東大寺嘅由來，可以追溯到728年，聖武天皇為紀念早逝嘅皇子菩提而建。之後，天平15年（743年），聖武天皇希望借助佛法嘅力量嚟消除社會不安，發願建造「盧舎那佛」（俗稱「奈良大佛」）。佛像喺751年鑄造完成，隨後大佛殿嘅建設又緊接進行，而其餘寺院建築亦陸續建造完成，整座東大寺嘅工期，前前後後長達40多年。由於東大寺受到天皇重視，建造規模相當龐大，曾經非常繁榮。但之後經歷咗至少兩大災劫，大部分寺院建築遺憾地喺戰火中被燒毀。
東大寺嘅觀賞重點
東大寺大佛殿內嘅奈良大佛高約15米，係世界上最大嘅鍍金青銅佛像，據說用咗將近500噸銅及440公斤嘅黃金。正式名稱係「盧舍那佛坐像」，建於奈良時代。據東大寺嘅文獻記載，有大約260萬人（約佔當時人口嘅一半），以各種形式加入大佛及寺廟殿堂嘅建設工程。而安置咗呢尊大佛嘅大佛殿，係世界上最大嘅木造建築，正面寬57米、深50米、高48米，結構氣宇非凡、氣勢雄偉。
另外，大佛嘅左側係虛空藏菩薩坐像，右側係如意輪觀音坐像。大佛嘅左右後方各有兩尊巨大嘅天王塑像：「廣目天」及「多聞天」。大佛殿內嘅一根樑柱上有一個洞口，據說係同大佛像嘅鼻孔一樣大，只要能穿過呢個洞，就可以無病無災。如果係小朋友嘅話，可能好輕易就過到呢！
除咗大佛殿，仲好推薦去視野良好嘅「二月堂」，由於地理位置極佳，唔單只可以將東大寺盡收眼底，仲可以遠眺奈良。「二月堂」喺每年3月1日至14日會舉行修二會（取水節）。
另外，東大寺內最古老嘅建築「法華堂」有日光菩薩、月光菩薩等10尊國寶佛像。仲有「戒壇堂」內嘅四大天王像，怒目圓睜、氣勢逼人，都好值得一睇！
景點資訊
- 名稱：大佛殿、法華堂、戒壇堂
- 開放時間：4至10月 07:30～17:30、11至5月 08:00～17:00
- 休息日：全年無休
景點資訊
- 名稱：東大寺博物館
- 開放時間：4至10月 09:30～17:30（最後入館17:00）、11至5月 09:30～17:00（最後入館16:30）
- 休館日：全年無休（會有臨時休館日）
去東大寺嘅交通資訊
從JR大和路線、近鐵奈良線奈良站乘搭市內循環巴士，車程約5分鐘，於巴士站「東大寺大佛殿、春日大社前」下車步行5分鐘。或從近鐵奈良站步行約20分鐘。
景點資訊
名稱：東大寺
- 地址：奈良縣奈良市雜司町406-1
- 交通方式：於巴士站「東大寺大佛殿・春日大社前」下車步行約5分鐘
- 對應語言：官網有英文版。現場販售繁體中文、英文、德文、法文、韓文嘅導覽手冊(700円)
- 入場費：600円、共通票（大佛殿+東大寺博物館）1000円
- 開放時間、休息日：設施各有不同
Comments