尾山神社位於古都金澤，入口門樓嘅上層裝設咗西洋彩繪玻璃，吸引好多遊客慕名前往參觀。尾山神社地理位置極好，從「金澤廚房」之稱嘅近江町市場、金澤城等主要景點同金澤車站行路都行到過去，咁方便易去，金澤旅行時一定唔可以錯過啦。
尾山神社嘅簡介
尾山神社建於明治6年（1873年），舊加賀藩士為咗紀念加賀藩第一代藩主前田利家立下嘅功績，而興建神社嚟祭祀前田利家及其妻子阿松。神社境內有本殿、拜殿、被列為日本國家重要文化財嘅神門、利家像，仲有以古代雅樂樂器造型而建造嘅名園—神苑等。
尾山神社嘅必睇之處
第一個必睇嘅就係建於明治8年（1875年），被列為日本國家指定重要文化財產嘅「神門」。呢個係一座非常特別嘅神社門樓，融合咗日式、中式、西式三種唔同嘅建築風格。門樓嘅第三層，裝設咗一種叫「Giyaman（ギヤマン）」嘅彩繪玻璃。夜晚點燈後，充滿神秘而夢幻嘅氣氛。以前呢座門樓上嘅彩繪玻璃，聽講連日本海上航行嘅船都可以睇到佢嘅光芒。呢座神社唔只紀念咗前田家嘅精神，喺保留傳統文化嘅同時亦融入咗新嘅元素，展現咗金澤人獨特嘅審美意識。
第二個必睇嘅就係模仿古代雅樂樂器造型所建造嘅名園「神苑」，一個屬於「池泉回遊式」風格嘅日本庭園。庭院內有模仿古箏形狀嘅「琴橋」、琵琶形狀嘅「琵琶島」、浮喺池水上嘅小島同小橋等，有「樂器之庭」之稱。喺庭園中一邊散步，一邊發揮天馬行空嘅想象力，試吓將身邊風景都想像成各種樂器啦！
去尾山神社嘅交通方法
於金澤站步行約15分鐘就到，或者搭「往南町、尾山神社方向」嘅北鐵巴士，所需時間大約10分鐘，喺南町・尾山神社站落車，徒歩約3分鐘。或者搭的士都只係5分鐘車程。
景點資訊
- 景點名稱：尾山神社
- 地址：〒920-0918 石川縣金澤市尾山町11-1
- 交通方式：參考上方
- Wi-Fi支援：設有英語導覽冊子（200円）
- 入門費：免費
- 開放時間：參拜時間為09:30〜15:30（辦理授與所、朱印時間為08:30～18:00）
- 固定休息日：沒有
Comments