石川縣加賀地區係著名嘅溫泉鄉，其特產美食都使用咗當地嘅新鮮海鮮同蔬菜等食材製作。今次就為大家推介5款必食嘅加賀美食。
加賀推薦美食（1）治部煮
「治部煮」係一種起源於金澤、加賀地區嘅鄉土料理，製作方法係將鴨肉、麵筋、百合根、香菇等材料加上日式高湯、醬油、砂糖、味醂同清酒燉煮而成。煮好後，再加少少芥末調味，帶出層次更豐富嘅味道。
喺加賀、金澤地區，有好多日式料理店或住宿設施都有供應治部煮。 其中推介兩間位於加賀溫泉站下一個站，大聖寺站附近嘅餐廳「Bantei（ばん亭）」同「Yamagishi（山ぎし）」，交通好方便。
加賀推薦美食（2）加賀蟹飯
「加賀蟹飯（加賀カニご飯）」係用咗加賀市橋立港捕獲嘅香箱蟹所製成嘅高級料理。香箱螃蟹擁有雪白飽滿嘅蟹肉、豐腴嘅蟹膏，味道非常鮮美。
加賀市區內有5間餐廳可以食到加賀蟹飯。每餐廳嘅菜式同風格都唔同，從日式到西式都有。雖然每間餐廳都值得一試，但特別推薦嘅係「Kuimonya Furusato（くいもん家 ふるさと）」同「Casa Fortuna（カーサ フォルトゥーナ）」。兩間餐廳都近加賀溫泉車站，交通便利。因為呢啲餐廳只提供限量嘅加賀蟹飯，所以出發前最好事先同店家確認好先吖。
加賀推薦美食（3）海鮮丼
加賀市橋立港捕獲嘅海產豐富，除咗蟹，仲有真鯛魚、鮑魚、甜蝦等各式各樣嘅海產。使用新鮮海鮮製作嘅海鮮丼飯係去加賀絕對唔可以錯過嘅名產美食。加賀海鮮丼飯係加入咗種類豐富嘅食材，可以一次過食到各種鮮甜美味！
加賀市區有好多餐廳可以食到海鮮丼飯，其中特別推薦橋立港附近嘅「割鮮Shintoku（割鮮しんとく）」同片津山溫泉嘅「桝屋（Masuya）」。
加賀推薦美食（4）鴨肉料理
喺加賀自古以來傳承一種叫「坂網獵」嘅野鴨捕獵法。用坂網獵法捕獲嘅野生鴨肉，肉質有彈性，無鴨肉獨特嘅臭味。使用呢種鴨肉製成嘅料理有火鍋、串燒同鴨扒。
可以食到加賀鴨料理嘅有「割烹 加賀」等等多間餐廳。而提供坂網獵方法捕獲鴨肉嘅餐廳有「Bantei（ばん亭）」同「Yamagishi（山ぎし）」,可以去一試！
加賀推薦美食（5）加賀巴菲
「加賀巴菲」加入咗加賀產嘅水果同蔬菜製作而成，共有5層。雖然係甜品，但因為加咗蔬菜，令佢成為加賀最受歡迎嘅點心食物。因為裡面有豐富嘅蔬菜同水果、色彩鮮豔，外觀亦好吸睛。
加賀市區內有6間店可以食到加賀巴菲。每間店都有唔同味道嘅加賀巴，可以根據間店所用嘅食材，或以巴菲嘅外觀嚟揀食邊間。如果你鐘意食水果，小編推薦去「加賀Fruit Land（加賀フルーツランド)」食；如果唔鐘意太甜膩嘅食物，咁就推薦你去「Hachizu（はちづを茶店）」。
Comments