嚟到金澤旅行，煩緊唔知買咩手信好？金澤歷史悠久，曾作為金澤城嘅城下町而興盛繁榮起嚟，所以有好多和菓子、工藝品等傳統特產一直流傳至今。所以今次小編就為大家介紹去到金澤要買啲咩推薦嘅手信。
金澤傳統手信：落雁
「落雁」（らくがん，Rakugan）係金澤自古傳承落嚟嘅傳統和菓子。喺一種粘性非常高嘅米粉中，加入砂糖、糖漿等材料，再用模具壓制並晾乾成形嘅精緻甜點。味道細膩，入口即溶。和菓子有多色彩嘅花型、圓形等形狀，精美嘅外觀非常賞心悅目。
大部分嘅和菓子店都可以買得到落雁，特別推薦擁有160年以上歷史嘅和菓子老店「諸江屋」。
金澤傳統手信：金鍔
「金鍔」（きんつば，Kintsuba）係金澤最具代表性嘅銘菓（甚有名氣嘅當地特產和菓子）。金鍔係使用精心挑選過嘅大納言紅豆，加入寒天同砂糖熬煮成餡，冷卻凝固後切塊，塗上薄薄嘅麵粉做餅皮後再烤製而成。煎熟嘅表皮散發淡淡香氣，包著滿滿嘅紅豆餡，仲加埋少少鹽，甜味同鹹味取得平衡點，配合得非常夾。另外，其他仲有加咗石川名產—能登栗子等唔同口味嘅金鍔添。
金澤大部分和菓子店都可以買得到金鍔，其中以「中田屋」最出名。
金澤傳統手信：紙氣球
「紙氣球」（紙ふうせん，Kami-Fusen）係一種粉彩色、可愛球狀嘅和菓子，係日式傳統點心「最中」嘅一種創新版本。以糯米製成餅皮，塗上粉紅色或粉綠色，內餡裝有一粒骰仔大小嘅寒天軟糖。粉彩色嘅軟糖有多種口味，例如，粉紅色嘅係葡萄味、白色係白酒味、黃色係檸檬味等。外層嘅「最中」餅皮食落酥脆，裡面嘅寒天軟糖彈牙有咬口。無論外觀定口感都好精緻呀。
「紙氣球」由和菓子老店「高木屋」製造並販售。
金澤傳統手信：金箔工藝
「金箔工藝」係金澤代表性嘅傳統工藝。金澤自古以來就係金箔嘅產地，金箔產量佔日本全國99%。所以喺金澤可以睇到好多加入金箔製作嘅物品，例如有各種特產、甜品、雜貨等等。尤其飾品盒等生活雜貨唔只實用，當作室內裝飾品都好靚。塗咗金箔嘅盒子上面，繪有櫻花、鶴等傳統日本風嘅圖案，呈現高級嘅質感。
想買金箔工藝品，推薦去「箔一」或「Sakuda（さくだ）」等店鋪。除咗買嘢，仲可以參加貼金箔體驗，難得嚟到不如試玩吓啦！
金澤傳統手信：水引
「水引」係金澤嘅稀少傳統工藝。水引係結婚等喜慶上嘅信封或禮品上，以紙繩編織而成嘅裝飾物。現今用作髮飾、裝飾物、室內裝飾等實用物品。以紅色、白色、黃色呢啲顏色鮮艷嘅繩編織成花形，展現出工匠嘅精湛工藝。
如果想買水引，可以去「千與世水引」或「津田水引折型」等水引工藝品專門店。店內亦可以參觀水引嘅製作過程。
金澤邊度買手信好？
以上介紹嘅金澤特產等手信，都可以喺金澤市區內買到。特別推薦JR金澤站內嘅購物商場、「名鐵Emuza」百貨公司、「石川縣觀光物產館」等。呢啲地方匯集咗好多店鋪，選擇性豐富。金澤觀光之餘，去行街買手信都可以買得開心！
Comments