山中溫泉位於石川縣加賀市，係一個擁有自然風光美景，並保留豐富傳統文化嘅溫泉鄉。呢度唔只有好多日式溫泉旅舘，仲有好多觀光名勝。
關於山中溫泉
山中溫泉位於日本石川縣加賀市嘅溪谷山澗，擁有1,300年歷史。當地嘅溫泉酒店同旅館大多集中喺大聖寺川溪谷沿岸，浸溫泉嘅同時可以盡情享受一年四季壯觀嘅自然美景。另外，山中溫泉有好多知名嘅日本傳統工藝品，例如「山中漆器」、「九谷燒」等。當地可以搵到好多展售呢類工藝品嘅店舖㗎。
山中溫泉地區嘅必遊之處
「山中溫泉」有好多溫泉旅舘，亦有唔少歷史遺跡、個性商店、藝廊等。以下就同大家介紹一啲必去嘅景點。
漫步於溫泉街 做文青發掘傳統工藝品
去到山中溫泉，就一定要去行吓溫泉街啦，有好多文藝相關嘅店。可以去「山中座」欣賞山中傳統藝術表演，仲可以去「山中漆器傳統産業會館」，了解山中漆器工藝品嘅製造過程，仲有展示同販售漆器。
另外，中心地區嘅「YUGE街道（ゆげ街道）」有各式各樣嘅商店。有傳統工藝品店、餐廳、當地生產嘅酒類專賣店、紀念品店等都有。等你可以邊行街，邊覓食，邊Shopping，好好享受溫泉之旅！
享受浸溫泉同足浴嘅體驗
山中溫泉仲有好多地方可以俾你體驗旅館溫泉以外嘅溫泉世界。例如，山中溫泉總湯 「菊之湯」係公眾溫泉浴池，唔使留宿，淨係浸溫泉都得。而「菊之湯」前仲有一個可以免費使用嘅足浴。有機會一定要去體驗一下！
鶴仙溪 ：山中温泉嘅自然風景區
山中溫泉區嘅「鶴仙溪」景觀非常優美，有北陸第一美溪之稱。沿著溪谷有一條1.3公里長嘅步道，可以一邊散步一邊欣賞櫻花、新綠、紅葉等唔同季節景色，又可以睇到造型獨特嘅岩石，以及橫跨溪谷嘅橋樑。
「蟋蟀橋（こおろぎ橋）」同「綾取橋（あやとりはし）」係鶴仙溪地區嘅代表性景點。呢兩座橋各有特色，蟋蟀橋（こおろぎ橋）係一座傳統日本木橋；而綾取橋（あやとりはし）則具有獨特嘅紫紅色外觀同嶄新嘅S形造型。可以欣賞兩座橋，融入於周圍溪谷美景嘅完美景象。
※「蟋蟀橋（こおろぎ橋）」目前正在施工，工程預計至2019年10月完成。
去山中溫泉嘅交通方法
距離山中溫泉最近嘅係山中溫泉巴士總站。從JR加賀溫泉站出發，搭加賀溫泉巴士約30分鐘就到。
景點資訊
- 景點名稱：山中溫泉（山中溫泉巴士站）
- 地址：〒922-0115石川縣加賀市山中温泉本町1-31
- 路線：乘搭加賀溫泉巴士約30分鐘
- Wi-Fi支援：有（免費加賀Wi-Fi）
- 語言對應：中文、美文、韓文
- 可使用信用卡: VISA, MasterCard, JCB, AMERICAN EXPRESS, Diners Club International (因地方而異)
Comments