白山市係位於石川縣南邊嘅地區，擁有日本北陸地區三大名山之一嘅白山。大自然風光加上山腳有溫泉鄉同歷史建築群，又有博物館等觀光景點，好適合你到來旅遊！
有關白山市
白山市自然環境豐富，係一個被群山、河川、大海包圍嘅地區。而且係石川縣內最大嘅市區，有多個觀光景點。白山市主要分為3大觀光地區：市區街道面向日本海嘅北部、手取川為中心地帶嘅中部、以白山為中心嘅南部。
白山市嘅特色同必去之處
白山市每個地區作為旅遊景點都有唔同魅力，今次就為大家分別地介紹每個地區嘅特色同推介景點啦。
白山市北部地區：大海與沖積扇地貌
北部地區內有白山市作為觀光據點嘅主要車站—JR松任站，及其面向日本海擴展嘅沖積扇形街道。觀光景點方面，從海水浴場、海濱公園等海邊景點，到標高650米嘅「獅子吼高原」體驗滑翔傘嘅活動都有。
另外，呢度仲有好多寺廟神，例如有以靈峰白山作為「御神體」（作為拜祭對象）嘅白山比咩神社、日本北陸地區最古老嘅神社—金劔宮等具有歷史性嘅觀光名勝。
白山市中部地區：河川溪谷地帶
中部地區係以手取川作為中心地帶，自然景觀一流嘅地區。特別係手取峽谷係必去嘅景觀名勝，可以睇到20至30米高、延綿不絕嘅懸崖絕壁，仲可以喺度睇到落差32米嘅巨型瀑布，景色非常壯觀！
此外，呢個地區仲有白山一里野溫泉滑雪場同溫泉鄉等旅遊景點。
白山市南部地區：群山與雪景地區
白山市嘅南部係以白山為主嘅大自然地區。唔同季節可以享受唔同樂趣，夏天時可以登山，冬天時可以滑雪。除咗大自然景觀之外，仲有展示從白山市發掘出嘅化石文物同恐龍時代微縮模型嘅白山恐龍公園白峰、保留著傳統建築物嘅白峰村等，而且又多溫泉設施，唔使入住都可以使用嘅溫泉設施又有，免費足浴都有添，有各式各種嘅觀光景點等你嚟發掘！
白山市嘅美食及餐廳
受惠於山林河川等自然環境，所孕育出嘅食材都好豐富，所以以白山山腳採摘嘅食材而製作嘅御膳料理—白山百膳，同蕎麥麵等美食都好出名。可以食到白山特產美食嘅餐廳，主要集中喺白山市北部嘅街道，不過去到中部同南部都有少數「食事処」（日式食店）可以食得到呀。
白山市嘅酒店、旅館
白山市各區都有好多住宿設施，北部多數有酒店、民宿；而中部就比較多公寓型Guest House、旅館；而南部就因為有一里野、白峰等溫泉地，所以較多溫泉旅館，不過都有啲公寓型Guest House、民宿等可以選擇。
去白山市嘅交通方法
要去白山市玩，可以以JR松任車站作為落腳點。如果係金澤過去，都係搭10分鐘北陸本線列車就到。之後再喺JR松任站搭巴士，就可以輕鬆去到各個地區玩。
景點資訊
- 名稱：白山市（JR松任站）
- 地址：〒924-0022 石川縣白山市相木町1020
- 交通：從JR金澤站搭10分鐘北陸本線列車到JR松任站
- Wi-Fi支援：有 (Hakusan Free Wi-Fi)
- 語言對應：英文
- 可使用信用卡：VISA, MasterCard, JCB, AMERICAN EXPRESS, Diners Club International
Comments