金澤旅行唔可以錯過嘅名產美食&推介餐廳

面向日本海嘅金澤，以使用新鮮海鮮製作嘅美食料理而聞名，仲有各種當地鄉土料理同傳統和菓子等。嚟到金澤旅行，一定要食盡佢，一飽口福！

金澤必食之一：手握壽司

「手握寿司」係金澤嘅必食美食之一。喺金澤面對嘅日本海上可以捕獲到大量各種海產，特別係赤鯥、甜蝦等海鮮品質非常高！喺金澤有好多餐廳都可以享用到以新鮮魚類手握嘅壽司，其中迴轉壽司店因價錢實惠而大受歡迎！

想喺金澤食迴轉壽司，推薦去金澤車站開店嘅「壽司玉（すし玉）」同埋近江町市場名為「近江町市場壽司」嘅人氣店鋪度食新鮮美食壽司呀。

金澤必食之二：加能蟹

加能蟹係金澤冬天嘅代表美食！加能蟹即係石川縣產，身長約9厘米以上嘅雄性松葉蟹（又名雪蟹），11月至3月為旺季。由於喺日本海優良嘅天然環境下孕育，蟹腳腳肉肥滿，食落有咬口！有各種烹調方式，多種食法，你可以揀生食刺身、水煮蒸熟、製成天婦羅或燒烤食用都得！各種蟹菜式味道唔會好濃味，比較清淡，但反而更食得出獨特嘅「蟹味」同鮮甜味。

想食正加能蟹，推薦去「大名茶家」或「市之藏」等日式料理店呀。

金澤必食之三：金澤咖喱

金澤咖喱以不鏽鋼盤裝盛，白飯上盛滿濃郁嘅咖喱，最上面擺上醬汁炸豬扒，再配上大量生菜絲，見到都流哂口水呀！香濃嘅咖喱、夾埋炸得鬆脆嘅豬扒，簡直係妙絕嘅配搭！

喺金澤市內好多餐廳都有提供金澤咖喱，其中推薦「冠軍的咖哩（カレーのチャンピオ）」同「GOGO咖哩（ゴーゴーカレー）」兩大受歡迎餐廳。

金澤必食之四：金澤蛋包飯

金澤蛋包飯（ハントンライス）係發源於金澤嘅西式美食。喺番茄醬炒飯上鋪上一層薄薄炒蛋，再喺上面放上炸蝦同炸魚，份量十足！炸物上淋上塔塔醬同蛋包飯所用嘅番茄醬令味道比起一般蛋包飯較重口味。

唔同餐廳所用嘅調味料同配菜都唔同，想享用正宗嘅金澤蛋包飯，推薦去「Grill Otuka（グリルオーツカ）」或「Grill中村屋（グリル中村屋）」等老牌西餐廳。

金澤必食之五：上生菓子

上生菓子係金澤嘅名產和菓子。係喺茶席上配上抹茶享用嘅甜點，於1700年代左右開始流傳至今。以白豆沙餡或求肥（糯米粉加入砂糖及水飴製成嘅材料）等製成，滑順濕潤口感為特徵。砂糖散發出嘅甘香於口中蔓延，美味無比。另外，以手工技法呈現山水、花鳥等意境，外觀造型優雅精緻。

喺石川縣内各甘味處（甜味和菓子店）都可以食得到，其中「漆之實」同「森八」都係出名店舖。