相信大家講起鳥取縣，唔少人會即刻諗起當地代表性嘅人氣旅遊景點——鳥取砂丘。但其實鳥取縣嘅魅力除咗砂丘之外，仲有多個精彩旅遊、美食景點，更擁有10個引以為傲嘅溫泉鄉！另外，鳥取縣連機場都大有睇頭，皆因以漫畫命名嘅兩大機場「鳥取砂丘柯南機場」與「米子鬼太郎機場」就喺鳥取縣！即刻跟住小編睇更多鳥取縣嘅相關資訊，以及必睇精彩位！
究竟鳥取縣係位於日本邊度？氣候又如何呢？
位於日本中國地區東北部嘅鳥取縣，形狀呈左右細長，北部有面向日本海嘅延綿海岸線，南部有以名峰「大山」為首嘅群山，擁有豐富嘅大自然美麗景點。鳥取縣位於相對比較溫暖嘅地域，特別係春季至秋季期間晴朗嘅日子相當多，如果想舒適地喺鳥取觀光旅遊，推薦可以喺春、夏、秋季起程。
鳥取縣根據唔同地區有截然不同嘅魅力。本篇文章將鳥取縣劃分成「鳥取、岩美」、「中部」、「米子、境港」、「大山」、「近郊周邊」5大旅遊區域，為大家作詳盡介紹喔。
鳥取、岩美地區：鳥取砂丘固然精彩，白兔神社亦係必推景點！
鳥取、岩美地區以鳥取市嘅海岸線為中心，擁有「鳥取砂丘」、海水透明度高嘅「浦富海岸」等著名旅遊景點。特別係日本最大規模嘅砂丘——「鳥取砂丘」最廣為人知。置身於「鳥取砂丘」可以欣賞到一望無際嘅大海、湛藍清澈嘅天空，以及遼闊嘅沙丘交織而成嘅絕美景色。除此之外，喺鳥取砂丘附近有一間「砂之美術館」，當中有展示精巧且巨大嘅沙雕像，係必去嘅熱門嘅旅遊景點。另外，於2022年新開幕嘅時尚Café「TAKAHAMA CAFE」亦不可錯過喔！
除咗「鳥取砂丘」之外，作為日本神話、以及歷史舞台嘅「白兔神社」亦係極受歡迎嘅旅遊景點之一。由於「白兔神社」與被認為日本最古老嘅愛情故事「因幡白兔」有莫大關係，所以被認定為對祈求姻緣、愛情相當靈驗嘅神社而廣為人知。神社裡面仲可以見到多隻可愛吸睛嘅兔仔石雕、以兔仔為主題設計嘅繪馬與御守等，萌度十足！
相關文章
- 日本最大海岸砂丘 鳥取砂丘獨特景色及活動介紹
- 鳥取砂丘與周邊必去景點推介：「砂之美術館」&新開幕「TAKAHAMA CAFE」
- 因幡白兔傳說聖地：必去鳥取縣最強結緣景點「白兔神社」、絕美「白兔海岸」！
- 鳥取城跡、久松公園等3個鳥取縣知名古城遺跡
另外，將西洋風格嘅鳥取縣立圖書館復原並將其打造成與兒童歌謠、玩具等相關展示嘅「童玩館（わらべ館）」，亦係必去景點之一。裡面唔單止可以欣賞到約2000件嘅玩具展示，仲可以邊玩邊接觸玩具嘅相關歷史，相當過癮。
中部地區：「倉吉」、「三德山三佛寺」等保留著昔日風情嘅街道
中部地區以倉吉為中心，可漫步於充滿歷史感嘅日本老街。特別係倉吉嘅「白壁土藏群」，係以紅色瓦片屋頂同白色漆喰牆壁為特徴嘅傳統建造物林立嘅地區。可以一邊逛逛餐飲攤檔或特產紀念品商店，一邊欣賞留有17至19世紀歷史風貌嘅懷舊街景。
三德山三佛寺投入堂係建於懸崖峭壁凹陷處嘅國寶佛堂，其建造方法至今仍然成謎，呢個被保護超過1000年嘅佛堂，擁有令人著迷嘅神秘感。另外，山內亦可以欣賞到其他建築物。加上附近嘅「三朝溫泉」係世界數一數二嘅鐳元素溫泉，透過微量放射線有效促進新陳代謝，係鳥取縣著名嘅溫泉之一。
大山區域：「大山」、「鳥取花回廊」等大自然豐富嘅景點
大山地區以「大山」為中心，有好多美麗自然景觀嘅旅遊景點。大山係標高1,709米嘅熱門登山景點，從山頂可以欣賞到山麓平緩嘅傾斜坡地，一路相連至平原同日本海嘅壯麗景色。除咗登山之外，仲可以享受踩單車、沿着溪谷逆流而上嘅「溯溪」登山、觀星、甚至滑雪等冬季運動，每個季節都可以享受各式各樣嘅體驗。
日本最大規模嘅花卉公園「鳥取花迴廊」有著各式各樣嘅花卉綻放，隨著四季更迭可以欣賞到色彩繽紛嘅花景。例如有櫻花、鬱金香、玫瑰、百合、萬壽菊、向日葵等多種花卉。從室外庭院、水上花壇，到直徑50米、高21米嘅巨大玻璃溫室，以及附設屋簷嘅展望迴廊，一年四季，任何季節時期都能欣賞到各種花卉植物。另外，每年不定期舉辦、以月光照明為主題嘅「Moonlight Flower Garden」（ムーンライトフラワーガーデン），以及冬季限定夜間點燈「Flower Illumination」（フラワーイルミネーション），都可以欣賞得到燈海與花海所交織出與白天不一樣嘅夢幻空間。
米子、境港區域：從米子嘅城堡到境港嘅水產，皆魅力滿載嘅旅遊地區
位於米子市嘅米子城被美譽為「臨海天空之城」，從殘留著戰國時代痕迹嘅雄偉石垣建築，以及可於天守台上方眺望360度全景風景，都係米子城嘅魅力所在。另外，亦推薦大家閒逛城下町街道，仲有去可以同時享受海水浴&溫泉嘅「皆生溫泉」度過奢侈時光。
從米子站乘搭「鬼太郎列車」，抵達終點站「境港站」，可以見到「水木茂大道」、「水木茂紀念館」等鬼太郎與妖怪們出現嘅相關吸睛景點。而境港本身嘅蟹類及黑吞拿魚等漁獲量非常多，可以喺度品嚐得到美味嘅新鮮海鮮。另外，附近嘅「江島大橋」以其陡峭斜坡，從正面影過去可以影到好似牆壁一樣、被稱為「猛踩油門坡」（ベタ踏み坂）嘅相，一度成為城中熱話。強烈推薦你親身去挑戰，睇吓可以影到有幾斜啦！
相關文章
近郊周邊區域：提升財運必去金持神社！
擁有非常好意頭嘅「金持」二字作名稱嘅「金持神社」，亦正如其名，係著名祈求金錢運嘅神社。據聞呢個地方曾經係鐵嘅產地，當時鐵被認為「勝過黃金」，便將「鐵」讀成「金」嘅發音「KANE（かね）」，亦含有此村落擁有鐵山嘅意思，因此被稱為「金持」。
神社以祈求財運招福、生意興隆而聞名，聚集眾多嚟自日本全國各地嘅參拜者。神社所販售嘅金色福袋、御守等開運商品亦相當受歡迎。
鳥取當地美食及推薦餐廳
鳥取擁有豐饒大自然孕育嘅環境，亦被稱為「食材的寶庫」。好多餐廳都使用呢片土地生產出嘅食材嚟製作當地美食料理，可以喺JR鳥取站等主要車站附近就搵得到。此外，各地區嘅公路休息站或觀光景點等附近都有好多餐廳。
鳥取嘅特產品「二十世紀梨」
「二十世紀梨」係鳥取嘅特產品。酸味同甜味取得平衡，非常好味！二十世紀梨就咁食又好味，或者將梨肉製成各款甜品或零食點心都好好味，又可以透過唔同方式食到二十世紀梨嘅美味。
另外，以梨為主題嘅博物館「鳥取縣立鳥取二十世紀梨紀念館」提供多個關於梨嘅展區同體驗區。從倉吉嘅「白壁土藏群」徒步約16分鐘即可抵達，大家去倉吉旅遊嘅時候可以順便去行個圈喔。
相關文章
鳥取嘅品牌牛肉「鳥取和牛」
鳥取和牛係鳥取縣嘅品牌牛肉。肉質柔軟，入口即溶。雖有油脂但口感溫和，食起嚟滑口，獲得廣泛年齡層嘅喜愛。鳥取和牛嘅料理有牛扒、Shabu Shabu（涮涮鍋）、燒肉等多種食法可以品嚐和牛嘅美味。其中最推薦能品嚐牛肉原本美味嘅牛扒，同鳥取當地出產嘅蔬菜一齊食用嘅Shabu Shabu！
新鮮海鮮
鳥取縣面向日本海，一年四季都可以享受得到新鮮嘅海鮮。例如，11月至3月期間，除咗係松葉蟹「五輝星」嘅盛產時期，仲可以品嚐得到擁有濃郁香甜蝦味，名為「猛者蝦」嘅黑雜魚蝦，以及鳥取縣原創品牌商品，名為「Torohata（とろはた）」嘅日本叉牙魚等美味海鮮。另外，從6月至10月係一款去除咗墨袋，名為「白輝姫」嘅白魷魚之盛產時期。以上提及到嘅海鮮都係鳥取縣引以為傲嘅特產，下次去鳥取縣旅遊，記得要去品嚐一下新鮮上述嘅海鮮美食啦。
相關文章
鳥取酒店、旅館等住宿設施
鳥取嘅住宿設施大部份都集中喺JR鳥取站附近。特別係距離車站5分鐘路程範圍內，單純提供住宿嘅酒店相當多。此外，喺鳥取有10個著名溫泉地，各個溫泉地區都有好多天然溫泉嘅傳統溫泉旅館，可以入住體驗日本傳統待客之道。
相關文章
去鳥取嘅交通方式
如果去鳥取玩，建議以JR鳥取站為落腳點，搭「超級白兔號列車（特急スーパーはくと）」就可以從大阪、京都連接到鳥取、倉吉，相當方便。順帶一提，「超級白兔號列車」嘅首站係JR京都站，車程約2小時50分鐘即可抵達。
從東京搭飛機前往嘅話，可以利用鳥取縣內兩個以漫畫角色命名嘅機場，位於東邊嘅「鳥取砂丘柯南機場」與位於西邊嘅「米子鬼太郎機場」。機場所在地區係日本人氣漫畫家嘅出生地，以本人擁有嘅著名作品「柯南」同「鬼太郎」作為主題所設計嘅機場。
相關文章
關於鳥取縣內嘅交通
如果成個旅程都係玩鳥取，電車或循環巴士去縣內各個景點都好方便。除此之外，將極受歡迎嘅漫畫登場人物作為主題設計而成嘅「鬼太郎列車」、「名偵探柯南列車」等旅遊列車，有好多相關角色人物嘅擺設同裝飾，感覺好玩又過癮！另外仲有「若櫻鐵路」，沿線23個相關設施被登記為國家有形文化財，從列車與車站可以感受到濃濃懷舊嘅昭和時代風情。
景點資訊
- 景點名稱：鳥取（JR鳥取站）
- 地址：〒680-0835 鳥取縣鳥取市東品治町111
- 交通方式：從JR京都站乘搭特急列車約3小時
- Wi-Fi：有提供（tottori BB）
Comments