位於長崎嘅新地中華街，與橫濱、神戶嘅中華街並列為日本三大中華街。中華街內有多間飲食店，可以食到長崎特產「長崎Champon（ちゃんぽん）」（什錦麵）同皿烏冬（炒烏冬）等，又可以買小食同朋友Share，邊行邊食，享受「掃街」樂趣。以下就同大家介紹一下長崎中華街嘅歷史文化，同埋去到就必食嘅推薦美食啦！
喺日本長崎嘅中華街係點嘅？
長崎嘅中華街源於元祿15年（1702年），出島作為對外貿易嘅港口，為放置中國運嚟嘅貨物而興建咗倉庫，後來發展為新地中華街。位於填海地區嘅中華街係一條東至西、南至北總長250米嘅十字形街道，當中有中華飲食店、中華雜貨店、特產店等合共40間商店林立。
中華街基於中華圈嘅風水元素，喺四面實際方位分別設有東門、南門、西門、北門。唔只全部採用中國製嘅瓦頂，為咗發展成為可以同檳濱及神戶睇齊嘅中華街，仲拜託中國工匠同使用中國福州引入嘅建築材料建造。
每年2月左右，長崎中華街仲會作為會場舉辦長崎燈籠節，經過裝飾，擺設五光十色嘅新繪燈籠後嘅畫面非常夢幻。
長崎新地中華街飲食攻略
中華街內有好多可以外賣嘅店，邊行邊食又得，一次過買返酒店食都得呀。以下為你推介去長崎中華街不能不食嘅長崎特產。
長崎新地中華街必食—長崎Champon
長崎Champon（日文為ちゃんぽん，即什錦麵）源於100年前中華料理店「四海樓」創辦人為咗令中國人留學生可用平價錢食到有營養嘅食物，而將日本長崎嘅海產、農產品加入中國福建嘅肉絲湯麵，而調製成新食品。食材通常有洋葱、椰菜、豆芽、木耳、魚肉片、猪肉、魷魚、花蛤等海產總共10種左右。而湯頭就有用豬骨湯或雞骨湯，每間店用嘅湯都會唔同。
長崎新地中華街必食—皿烏冬
皿烏冬（日文為皿うどん，即炒烏冬）係由長崎Champon改製而成。製作方法基本同長崎Champon相同，最大分別在於唔係用湯麵，而係炒Champon麵，令湯汁直接浸入麵條，然後再落油炒麵令麵條變脆。麵條有幼麵、厚麵條兩種。幼麵嘅話就加太白粉落已加糖嘅甜湯頭，令麵帶黏狀，上面再加上配料（如上圖）。而厚麵的話，就將烤過嘅麵同湯頭一齊炒，讓麵條邊炒邊入味，食落有煙韌嘅口感。
長崎新地中華街必食—笑口棗、炸麻花捲等中華小食
喺中華街可以買到好多唔同種類嘅中華點心外賣，例如有新鮮出爐嘅饅頭中夾煮得軟腍嘅豬肉嘅餡而成嘅「角煮饅頭（角煮まんじゅう）」、包紅豆餡、撒上芝麻拎去炸嘅「笑口棗（ごま団子）」、硬身脆口嘅炸點心「炸麻花捲（よりより）」、用方包包著除殼蝦再拎去油炸嘅蝦多士（ハトシ）等等中華傳統小食都可以喺度食得到！
去長崎新地中華街嘅交通方法
長崎站過去的話喺「長崎站前」電車站搭路面電車（1番系列車，往崇福寺方向），約8分鐘後喺新地中華街落行。或者從長崎車站搭的士過去都係4分鐘，非常方便。
景點資訊
- 名稱：長崎新地中華街
- 地址：〒850-0842 長崎縣長崎市新地町一帶
- 交通： 長崎站前→[路面電車（1番系列車，往崇福寺方向）]約8分鐘→新地中華街站
Comments