位於奈良室生地區嘅室生寺，係真言宗室生寺派嘅根據地。有「金堂」等國寶同重要文化財產。4月下旬到5月上旬係石楠花季、11月有美麗嘅紅葉美景，都係奈良熱門嘅觀光景點。
室生寺簡介
位於奈良縣同三重縣嘅縣境附近、深山溪谷環繞嘅室生山山腰，有一座環境清幽嘅室生寺。室生寺係佛教真言宗寺廟，相較於同屬真言宗、嚴禁女性入山嘅高野山，室生寺准許女性進入參拜，因此被稱為「女人高野」。室生寺係奈良時代末期，由興福寺嘅高僧賢璟所創建。寺院境內有朱紅色嘅「仁王門」、橫跨室生川嘅朱漆「太鼓橋」，以及屋頂曲線優美嘅「彌勒堂」等寺院建築。室生寺佔地廣闊，建議安排1個半鐘嚟參觀。另外，亦有「寶物殿」，收藏十一面觀音像（日本國寶）、釋迦如來坐像（日本國寶）等珍寶，預計於2020年3月中旬開幕，屆時都係不可錯過嘅參觀重點！
室生寺嘅必睇重點
室生寺內嘅金堂、本堂、五重塔被指定為國寶。五重塔係平安時代初期建立，係室生寺內最古老嘅建築，傳聞係高僧空海喺一夜之間建造嘅。五重塔高約16米，係日本最細嘅室外木造五重塔。每年4月中旬到5月中旬，通往五重塔嘅石板路兩旁開滿石楠花，亦係室生寺嘅代表性美景。
另外，供奉主佛釋迦如來立像（國寶）嘅「金堂」、供奉平安時代嘅傑作ー本尊「如意輪觀音坐像」（重要文化財產）嘅「本堂」都係不可錯過嘅重點！「十一面觀音立像」都好精彩，圓潤嘅雙頰、櫻桃小嘴、神情慈悲莊嚴；觀音像嘅主體係用一整塊木材雕出嚟，觀音頭部嘅十一個面都係採用一整塊木材雕成。
室生寺嘅季節性美景及祭典活動
每年4月中到5月中都會舉辦「石楠花祭典」，通往五重塔嘅石板參道兩旁，有將近3,000株石楠花盛開，呈現一片粉紅花海。而11月中旬到12月上旬係「紅葉祭」，通去金堂石頭階梯兩旁嘅楓葉隧道特別靚！喺呢幾個祭典舉行嘅月份，仲會加開長谷寺到室生寺之間嘅臨時接駁巴士添。
去室生寺嘅交通方法
從近鐵室生口大野站乘搭「往室生寺前方向」嘅奈良交通巴士，車程約15分鐘，到終點站落車後步行約5分鐘。
景點資訊
- 名稱：室生寺
- 地址：〒633-0421 奈良縣宇陀市室生78
- 交通方式：從近鐵室生口大野站搭乘「往室生寺前方向」嘅奈良交通巴士，車程約15分鐘於終點站落車步行約5分鐘
- Wi-Fi支援 : 部分地區有免費Wi-Fi
- 對應語言：提供繁體中文、英文、韓文的導覽手冊
- 票價：600円
- 開放時間：4月1日至11月30日 08:30～17:00、12月1日至3月31日 09:00～16:00
- 休息日：全年無休
Comments