出島係長崎其中一個必去嘅觀光景點，係日本實行鎖國政策期間全日本唯一一個對西洋開放嘅貿易通商地方。現今嘅出島將當時一部份嘅建築物復原並公開，係一個可以回到鎖國下嘅日本江戶時代，感受當下氣氛嘅長崎觀光名勝，年中吸引眾多旅客到訪。
出島的歷史價值
於寬永13年（1636年），江戶幕府為咗防止葡萄牙人於日本進行基督教傳教活動，加上為咗監視貿易，喺海角末端海洋上填海築起人工島—出島，並讓葡萄牙人居住於此。出島呈扇形形狀，總面積約1萬5000平方米，約為日本容納人數出名多嘅「東京巨蛋」嘅約三分之一。
及後，於寬永18年（1641年），位於長崎縣平戶嘅荷蘭商館遷到出島，直至安政6年（1859）為止大約200年間，作為能够與西洋國家進行交易嘅唯一地方，將各式各樣外國文化通過出島傳到日本。其中同荷蘭嘅貿易包括毛織品、砂糖、玻璃製品等等進口貨品；而從日本出口嘅有金、銀、銅、陶瓷等。
為咗保留具歷史價值嘅文物，日本於19世紀初開始進行出島嘅復原計畫。直至2019年6月，「甲比丹（Capitão，當時商館會長）的房間」等共16棟建築物已修復完畢，另外，當時作為通往出島出入口嘅「出島表門橋」亦已完工，將出島展現於世人面前。
出島的特色看點
修復後嘅16棟建築物當中，必睇嘅係「甲比丹的房間」。「甲比丹（Capitão）」喺葡萄牙語中係商館會長嘅意思，「甲比丹的房間」被使用作為館長嘅事務所同居所，係出島最大嘅建築物。喺榻榻米上放置西式傢俱嘅和洋合璧房間裏，重現當時過耶誕節，在餐枱擺放著豪華料理嘅情景，由此重現情景可推測，意外地原來當時嘅日本人係圍著餐枱，以御膳（小餐桌上放置一套套食物）食飯為主㗎喎！
除此之外，仲有好多建築物可以帶你回到過去了解昔日生活情況，例如有收納進口砂糖等嘅倉庫「一番蔵」，喺「甲比丹的房間」內製作食物嘅「料理房間」等等。
經出島引入日本嘅西洋文化
昔日各式各樣西洋文化經長崎縣出島傳到日本全國，例如，咖啡、啤酒、朱古力因為係荷蘭商館館員嘅嗜好品，而被帶入日本。另外，由於無法從出島行到長崎街道，荷蘭商館館員經常喺出島玩羽毛球同桌球等作為消遣，因而都經出島而流傳開去。無論係邊個生活情景，都見證咗其實長崎居民當時對住呢啲難得一見嘅西洋文化，係幾好奇！
去出島嘅交通方法
首先喺長崎站前乘搭「往崇福寺方向」嘅路面電車，到「出島」落車。如果想搭巴士的話，可以喺長崎站前南口出口搭「往新地Terminal（ターミナル）方向」巴士，到「長崎新地Terminal（ターミナル）」落車，徒歩約5分鐘。
景點資訊
- 名稱：出島
- 地址：〒850-0862 長崎県長崎市出島町6-1
- Wi-Fi支援 ：有（有部份範圍）
- 語言對應：官方網頁有英文。售票處有日文、中文（繁／簡）、英文、韓文、荷蘭文的單張提供
- 門票：510円
- 可否使用信用卡：可以
- 開放時間: 08:00～21:00 (最後入場時間20:40，18:00以後入場的話，只可於出島表門橋進入。（西面或東面門口於18:00閉門）
- 休息：無休
Comments