奈良國立博物館位於奈良公園，係一個展示日本國寶、被列為重要文化財等物品嘅博物館。除咗日本收藏品，仲會展示多個東亞地區嘅佛教藝術品。
奈良國立博物館內展區
奈良國立博物館於1895年開館，係日本第二古老嘅國立博物館。館內分別設立常設展覽區及特別展覽區，展出各種書籍、彫刻、繪畫等佛教藝術品。另外，博物館附設嘅「佛教美術資料研究中心」有著近代和風建築風格，係一個保存及公開各種佛教藝術相關嘅調査研究資料嘅設施。
奈良國立博物館嘅參觀特色
奈良國立博物館內分為「奈良佛像館及青銅器館」和「西新館及東新館」兩大建築物。而連接兩區嘅地下迴廊設有博物館禮品店及餐廳，參觀期間都可以喺度買紀念品、食飯同休息一下。以下就同大家介紹一下各館嘅特色之處啦。
奈良佛像館及青銅器館
首先奈良佛像館展出日本國寶、被列為重要文化財嘅約100尊佛像。由坐佛、站佛、體型細小嘅佛像，到等身嘅佛像大大小小、不同種類嘅都有。想喺日本要一次過鑑賞咁多種唔同嘅佛像，就一定要嚟呢度啦！
而從奈良佛像館走過長廊就到青銅器館。可以在此館內鑑賞多種中國古代嘅青銅器。青銅製嘅容器同樂器佔大半數，其餘仲有古時武器、馬具、農產工具等，全部一共約有380件收藏品。
西新館及東新館
西新館及東新館主要作為特別展覽嘅會場，全年展出唔同嘅主題，尤其以每年秋季所舉辦嘅「正倉院展」為重點。正倉院，係建於奈良公園内，一個歷史悠久嘅倉庫，內裏收藏及保管8世紀建立東大寺嘅創建者—聖武天皇有淵源嘅物品、中國器皿、伊朗及印度工藝品等各種珍費物品。平時不對外開放嘅正倉院，一年只開放一次，展出各種珍寶文物，係非常受歡迎嘅特別展覽。
奈良國立博物館嘅開放時間及入場費用
奈良國立博物館開放時間基本為早上9點半至下午5點，但星期五、六開放至晚上8點。每逢星期一以及每年1月1日休館。入場費為大人520円。（截止至2019年6月資訊）
另外，特別展覽展出期間，開放時間及入場費用可能有所更改，建議事先check好官網先去啦。
去奈良國立博物館嘅交通方式
首先搭去JR奈良站或近鐵奈良站，然後轉乘市内循環巴士、外圈方向（外回り方向），於「冰室神社・國立博物館」站落車。從JR奈良站乘搭約7分鐘，從近鐵奈良站乘搭約4分鐘抵達。
另外，從近鐵奈良站行都行到過去博物館，需時約15分鐘，天氣好時當散步，邊行邊感受奈良嘅懷舊氣息都唔錯呀。
景點資訊
- 景點名稱：奈良國立博物館
- 地址：奈良市登大路町50
- 交通方式：
- JR奈良站→[循環巴士]約7分鐘→於冰室神社・國立博物館⋯徒歩約1分鐘
- 近鐵奈良站→[循環巴士]約4分鐘→於冰室神社・國立博物館⋯徒歩約1分鐘
- 是否提供Wi-Fi：有（NARA Free Wi-Fi）
- 對應語言：中文、英文
- 購票地方：購票處
- 可使用信用卡：VISA, JCB, AMERICAN EXPRESS, Diners Club International, 銀聯
Comments