日本型爆列車大公開 ~ 西日本篇 ② ~

唔知大家鍾唔鍾意日本嘅火車呢？小編就好鍾意，因為唔同嘅列車就自己嘅個性同特徵，無論外型、速度、功能、服務都可以好唔同。不如我地一齊嚟睇下幾款唔同嘅日本火車（或者用返日文叫電車）！

新幹線500系: 好似飛機咁嘅新幹線

新幹線500系係運行於山陽新幹線(新大阪至博多之間)。佢最大嘅特徵就係車頭好似戰機咁細尖而流線型，令到成架車望上去亦都好似飛機咁。車頭長27米，而超過一半嘅15米就係尖起嚟嘅部份，呢個特徵令佢係一眾新幹線裡面與別不同。

設計上考慮到風阻同車速嘅關係，整加新幹線嘅車身都係呈流線型設計。除左佢嘅外型似飛機之外，都入面嘅座位都好似飛機。

由2018年6月30日開始，JR西日本同Hello Kitty合作，係山陽新幹線嘅新大阪至博多區間，每日定時班次嘅「Kodama 730/741」都會由變身做粉紅色Hello Kitty設計嘅新幹線500系運行。係咪即刻心動，想下次嚟到關西，九州地區時，計劃下坐呢款Hello Kitty新幹線呢？

呢款被稱做「Doctor Yellow 黃博士」嘅列車，其實正式名為「新幹線電氣軌道綜合試驗車」。

呢架車唔係平日可以坐到，佢係用嚟檢查路軌同架空電欖有無出現問題，最高速亦可達每小時270公里。點解黃博士係黃色？因為工程同檢查通常係夜晚進行，要用比較Sharp嘅顏色方便辨認。同時因為佢同普通新幹線嘅外型差唔多，為左避免乘客上錯車，專登用比較搶眼嘅眼色等大家分辨到唔同。

「黃博士」係運行喺東海道山陽新幹線(東京至博多區間)。佢大概每十日就當值一次，第一日先由東京檢查到博多，然後第二日回程由博多檢查返到東京。

由於「黃博士」嘅運行時間不定，好難有機會遇上。所以佢都被稱為「幸運嘅黃色新幹線」，傳說話見到嘅話會帶嚟好運(其實係你見到已經好好運)。

今次就講到呢度，日本仲有好多好正嘅列車，我地下篇文章會繼續介紹日本罕見嘅火車。千祈唔好錯過啊！