應該有好多人同小編一樣，都鍾意日本嘅電車吧？除咗新幹線之外，日本仲有好多唔同特徵嘅電車，速度、造型、功能、服務等等都各有特色。今次小編想同大家介紹幾款又型又好睇嘅列車，一齊繼續睇埋下文啦～
最高時速達285公里 「新幹線N700A」
N700系係行駛於東海道新幹線（新大阪站至東京站區間）同埋山陽新幹線（新大阪站至博多站區間）嘅新幹線列車。
東海道新幹線「N700A」於2013年2月8日正式亮相，將本來已經非常舒適嘅N700系新幹線進一步改良，座位寬敞，並減輕噪音同埋震動，提高穩定性。車如其名，A其實就係「Advance」嘅意思，為旅客帶來「Advance」乘車體驗。外觀方面，與同N700系相比並無太大分別，只係喺車身加左個細細嘅「A」字。
「N700A」最高時速達285公里，由東京站去到新大阪站最快只需要2小時22分鐘！
又快又舒服，比起巴士等交通工具，大大縮短移動時間。下次有機會一定要親身體驗下呢個285公里嘅高速感！
唯一有「包廂」嘅新幹線 「Hikari Rail Star」
灰色車身配上深灰窗框，車窗下面都印有黃色線條，而側面則印上「Rail Star」LOGO—車身設計如此獨特嘅，就係「Hikari Rail Star」。
被命名為「Rail Star」嘅列車係一輛行駛於新大阪至博多區間嘅山陽新幹線，採用「特別700系」，係目前唯一有「包廂」嘅新幹線。有別於普通N700系新幹線，「Rail Star」8號車廂入面設有4間包廂，每間包廂可容納3到4人。不過包廂費用就同普通車對號座費用一樣，唔需要好似「綠色車廂」咁需要加錢！
有個人包廂嘅「Hikari Rail Star」行駛班次唔多。如果想要親身體驗嘅話，就要記得提早預訂先買得到包廂位置。鍾意新幹線嘅鐵道迷，下次記得要試吓乘坐呢款「Hikari Rail Star」喇！
有外表又有內涵嘅新幹線 「E7系・W7系」
「新幹線E7系・W7系」係屬於東日本旅客鐵道與西日本旅客鐵道嘅新幹線列車。JR東日本叫E7系；JR西日本則叫W7系，除咗命名唔同之外，實際上並無任何分別。
車身用上藍、白、金對比色，非常sharp醒。車內傷健人士設備完善，全部座位都配有插頭，名副其實既有外表又有內涵！
新幹線於2015年3月14日成為北陸新幹線車輛，連接東京、長野、金澤。而金澤至敦賀間嘅工程亦已喺2012年6月獲批准動工，預計會喺2022年度內完工。
連接東京與金澤、北陸地區嘅新幹線，從此令旅行更方便。心動不如馬上行動，快啲嚟計劃去金澤同週邊地方玩一轉啦～
今次介紹嘅以上款新幹線，路線比較主流，可能好多人都坐過。下次再介紹連日本人都好少有機會見到嘅列車。敬請期待！
Comments