成田推薦必食3大名產美食推薦食店一次過介紹俾你！

千葉縣成田市係日本東京最多香港直飛航班到達嘅機場，成田國際機場嘅所在地。成田有知名景點「成田山新勝寺」或前往參拜途中兩旁並列日式民房嘅「成田山表參道」，唔只近機場，仲好多充滿魅力嘅觀光景點添。

去得成田玩就當然唔可以錯過成田當地嘅美食啦，今次就要同你介紹3款成田嘅名產美食。

喺成田嘅餐廳推薦必食美食之一：鰻魚

一講起成田，就一定係當地好出名嘅「鰻魚」料理喇。受歡迎嘅理由聽聞係當地人從以前就有經常喺河川捕魚、食魚嘅習慣。特別係進入江戶時代之後，去鄰近江戶（即東京）嘅成田山新勝寺作「成田詣」（參拜）嘅信眾有好多，所以提供鰻魚料理俾人舒緩長途移動嘅勞累同補充體力。

時至今日，去成田山新勝寺參拜嘅人仍然會繼續喺度嗌鰻魚嚟食。將鰻魚沾上以醬油同砂糖混合嘅醬汁，喺炭火上燒烤，然後放上米飯上嘅「鰻魚飯」真係連日本人好熱愛，係相當受歡迎嘅美食。其中「川豐」係一間好出名嘅人氣鰻魚飯店。

另一款去到成田就必食嘅就係「仙貝」。喺成田地區，買即烤好嘅仙貝嚟邊行邊食又得，做手信都得，都好受歡迎！使用糯米或粳米等為材料製成嘅麵糰，燒烤後沾上醬油同砂糖混合嘅醬汁後繼續烤，就算係日本人喺其他地方都難得可以食到新鮮烤好嘅仙貝呀。

而喺成田山新勝寺參道上嘅「林田」仙貝店，就可以現場品嚐到剛烤好嘅「ひび焼」仙貝，即有網狀裂縫的仙貝。而且仲有好多唔同口味或種類嘅仙貝，作為手信買返香港就最適合不過喇。

講起日本人去參拜成田山時嘅人氣美食之一，就係日式丸子喇！成田山表參道上有好多間丸子專賣店，間間口味都有啲唔同，可以試完呢間試嗰間。自古以來日本人就好鐘意食「だんご」（即日式丸子嘅日文），係將糯米搓成丸狀再沾上有點黏性嘅醬汁，呢款庶民美食同綠茶一齊食就最夾！

眾多店舖當中，可以喺「後藤糰子屋」店內食即製嘅熱辣辣日式丸子。旅遊途中行到攰，不妨去呢間店食個下午茶，休息吓先啦。