房總Flower Line（房総フラワーライン）係通過千葉縣房總半島最南端嘅海岸線道路。沿著道路兩旁種植好多花卉，隨著四季都有不同花景，係自駕遊車河或單車之旅嘅人氣路線。
關於房總Flower Line
房總Flower Line指嘅係從館山市至南房總市，長約46公里嘅道路。道路途中隨處可見油菜花同小白菊等繽紛花卉，係一個一排式花卉嘅絕佳賞花景點。根據唔同花種有唔同嘅開花期，而多數品種會喺1至4月期間盛開，就係最佳賞花期。
此外，因為呢個道路嘅區間未有電車通過，所以去呢個地區基本上需要搭巴士移動。或者都可以租借單車沿著海岸線踩。另外，可以喺車站、旅遊資訊服務中心同道路休息區等地方租借單車。
房總Flower Line的推薦看點
房總Flower Line除咗沿途有好多唔同種類嘅花卉綻放嘅景色之外，仲有燈塔等影到靚相嘅景點。就等我哋介紹俾你啦。
賞花就要去美麗花田！
房總Flower Line沿途有幾個花田，花景咁浪漫，真係唔可以錯過！例如「館山 Family Park」內嘅花田「花廣場」有約100萬株罌粟花盛開。喺7,500平方米嘅廣大花田裡，橙色、黃色等色彩鮮艷嘅罌粟花，一大片花田盛開時嘅風景非常靚！另外，園區內有餐廳同紀念品商店等，可以喺度留一整日都得。
「白間津花畑」亦係知名景點。罌粟花、紫羅蘭、金盞花等多種花卉嘅花田全景喺蔚藍大海作為背景下，可謂係一幅靚畫！
仲有燈塔等影相景點
房總Flower Line途中除咗有花田等賞花名勝之外，仲有公園、神社、燈塔等景點。特別推薦有燈塔嘅2個地方。第1個係「洲埼燈塔」，高15米嘅圓形白色燈塔。天氣好嘅時候可以從展望台欣賞到富士山或伊豆半島景色。第2個係位房總半島最南端嘅「野島埼燈塔」。喺高24米、八角形白色燈塔嘅展望台望出去可以欣賞到太平洋海景。
去房總Flower Line嘅交通方式
要去房總Flower Line，首先要搭到JR內房線嘅「館山站」先，可以喺JR千葉站搭直達嘅高速巴士，車程約1小時40分鐘；或者搭內房線電車，車程約2小時。
到館山站後再轉搭「往安房神戶方向」嘅JR關東巴士，到「相之濱」巴士站落車，徒步約10分鐘就到房總Flower Line嘅道路。
景點資訊
- 名稱：房總Flower Line（館山站）
- 地址：〒294-0045 千葉縣館山市北条
- 交通方式：從館山站搭JR關東巴士到「相之濱」巴士站落車徒步約10分鐘
- Wi-Fi：有免費Wi-Fi（TATEYAMA_FREE_WI-FI）
- 語言：中文、英文
- 信用卡：可使用VISA卡、MasterCard萬事達卡、JCB卡、AMERICAN EXPRESS美國運通卡、Diners Club International大來國際信用卡
Comments