千葉縣：成田國際機場所在地的首都圏地區

鄰近東京嘅千葉縣位於首都圈內，但同時亦有海洋同山林嘅豐富大自然資源。因此，從都市觀光到自然風光，都有著各式各樣嘅樂趣。

關於千葉縣

千葉縣嘅大部分土地都位於突出於太平洋嘅「房總半島」上。三面環海，北面與東京、埼玉、栃木等3縣連結。面對東京同東京灣嘅地區已發展成都市地區，但其他大部分土地都仲係丘陵地帶，好多都仍然保留住大自然豐饒風貌。

千葉縣一年當中大部份都係較溫暖嘅氣候。但係冬季嘅強風都唔睇得少，一吹埋嚟都幾凍吓！如果你下個目的地係去千葉，推薦喺晴朗天氣較多嘅4月中旬至7、8月左右去呀。

千葉嘅觀光地區大致可以分為3個部份。

第1個係東葛飾・北總地區。呢度係成田國際機場所在地，亦有「成田山新勝寺」同「香取神宮」等寺廟佛閣或具有歷史性嘅老街，都係推薦嘅觀光景點。

第2個係面向太平洋嘅九十九里・南房總地區。有「九十九里濱」等海灘，同水族館「鴨川海洋世界」都相當受歡迎。

第3個係面向東京灣嘅上總臨海・海濱地區。呢度有「養老溪谷」、「鋸山」等好多自然景觀勝地。此外，喺都市地區仲有「東京迪士尼度假區®」、「千葉市美術館」同「千葉港展望塔」等，都係千葉縣有代表性嘅知名觀光景點。

千葉有著各式各樣嘅海鮮同農產品，並有好多都有使用在地食材為料理嘅美食。

千葉三面環海，所以千葉有好多餐廳都可以品嚐到喺新鮮捕獲嘅魚類製成嘅壽司或海鮮丼。此外，千葉仲有好多出名嘅當地拉麵店，其中以「勝浦担担麵」最出名。勝浦担担麵係起源於南房總地區・勝浦嘅知名地方美食。加咗辣油嘅辣味拉麵真係越食越上癮，好受各「為食貓」歡迎㗎！

位於海濱地區嘅千葉站附近，有好多酒吧同居酒屋。喺各間餐廳都可以飲到千葉當地釀嘅酒，或者食到「Namero（なめろう，即味噌口味嘅剁碎魚生片）」同「海鮮燒烤」等鄉土料理。同埋好多店都會營業到深夜，咁去觀光都唔使急急腳走人啦！

如果想住喺千葉地區，千葉嘅主要車站附近或成田國際機場周圍都有好多住宿選擇。從青年旅舍到商務酒店，各式各樣嘅住宿設施都有。

如果想嘆吓溫泉，都可以去沿海嘅九十九里地區嘅「犬吠埼溫泉」或南房總地區嘅「鴨川溫泉」等溫泉區。如果本身行程前半部份有點趕，後半Relax吓先去搭飛機返香港都唔錯吖。

成田國際機場有世界各地嘅飛嚟嘅航班，喺香港無論傳統航空公司同廉航都有直飛航班到，交通便利。而想去千葉觀光就可以從成田國際機場搭JR成田機場快速列車到JR千葉站，車程約44分鐘左右。