被原始森林包圍嘅奥鬼怒溫泉郷指嘅係加仁湯、手白澤溫泉、日光澤溫泉、八丁之湯呢4個溫泉嘅總稱，有「關東最後的秘湯」之稱。因為交通不便，屬於比較隱世嘅秘湯，如果想去啲無咁為人熟悉嘅溫泉鄉靜靜地浸溫泉揀呢度就無錯啦。今次就同大家介紹呢4個溫泉嘅特色同交通方法啦。
關於奥鬼怒・鬼怒川溫泉
「鬼怒沼」濕地位於海拔2,040米，係原生林、瀑布同鬼怒川嘅發源地。而位於鬼怒川源流附近嘅奥鬼怒溫泉，係加仁湯、手白澤溫泉、日光澤溫泉、八丁之湯呢4個溫泉嘅總稱。位於日光國立公園内，吸引好多溫泉愛好者來訪。最近嘅巴士站係女夫渕巴士站，如果搭川俣的士或旅館接駁巴士，就可以去更入嘅地方。如果時間充裕，對自己嘅體力有信心的話，推薦去行吓「山毛欅」原始山林嘅行山徑呀。
奥鬼怒溫泉其1：加仁湯
擁有5種不同泉質嘅加仁湯，浸完可以令肌膚變得光滑，被譽為美人之湯。除咗第1到第3露天溫泉之外，仲有5種自家源泉嘅「利き湯 ロマンの湯」等獨特溫泉。另外仲有唔需要入住都可以享用嘅日歸溫泉（09:00～15:00，費用為800円）。
景點資訊
- 景點名稱：加仁湯
- 地址：栃木縣日光市川俣871
- 交通方式：
- 從「女夫渕」巴士站徒步約4.5公里（約1小時20分鐘）
- 提供住宿旅客接送服務（從「女夫渕」巴士站乘搭加仁湯接送巴士約25分鐘）
奥鬼怒溫泉其2：手白澤溫泉
透明無色嘅純硫黄泉水直接從地下自然湧出，泉水量豐富。分開男女室內溫泉同露天溫泉。晚餐提供自家製無添加料理。但留意手白澤溫泉鄉無日歸溫泉，如果有興趣就要入住其中一間旅館先體驗呢度嘅溫泉喇。
景點資訊
- 景點名稱：手白澤溫泉
- 地址：栃木縣日光市川俣870-2
- 交通方式： 從「女夫渕」巴士站徒步約2小時30分鐘
奥鬼怒溫泉其3：八丁之湯
此處為100％源泉掛流式嘅天然溫泉，有大眾湯「雪見之湯」、「滝見之湯」等3種混浴溫泉（無分開男女），以及可以眺望瀑布景色嘅「滝見露天風呂」。有日歸溫泉設施（09:00～15:00，費用為800円），提供交通接駁服務，仲有包含午餐、毛巾等3,500円等方案。
景點資訊
- 景點名稱：八丁之湯
- 地址：栃木縣日光市川俣871
- 交通方式： 從「女夫渕」巴士站徒步約1小時30分鐘
- 提供住宿旅客接送服務（從「女夫渕」巴士站乘搭接送巴士約30分鐘）
奥鬼怒溫泉其4：日光澤溫泉
日光澤溫泉於昭和2年（1927）創業，位置比八丁之湯同加仁湯仲遠，係一間吸引眾多登山客造訪嘅山中小屋風格溫泉旅館 。有兩種唔同泉質嘅露天混浴溫泉（無分開男女），同室內溫泉。亦提供日歸溫泉（09:00～15:00，費用為500円）。
景點資訊
- 景點名稱：日光澤溫泉
- 地址：栃木縣日光市川俣874
- 交通方式： 從「女夫渕」巴士站徒步約2小時
去鬼怒川溫泉・奥鬼怒嘅交通方式
從東武「鬼怒川溫泉站」搭「途經治溫泉，往女夫渕溫泉方向」嘅市營巴士，車程約1小時15分鐘，於「女夫渕溫泉」落車。從巴士站搭旅館接駁巴士（請留意日歸溫泉並沒有提供巴士接駁服務）。如果旅館無提供接駁服務，就要徒步行過去。同車站距離由近到遠嘅溫泉分別為八丁之湯、加仁湯、日光澤溫泉、到最遠嘅手白澤溫泉。搭巴士途中可以欣賞到人造湖「川俣湖」，夏天一片蔥蔥綠綠，秋天則可以賞紅葉，一年四季景色各有魅力。
Comments