那須鹽原：以那須高原聞名的人氣溫泉地

那須鹽原位於栃木縣東北部。西北面被那須五岳群山環繞，有溫泉鄉同豐富嘅自然景點；而東南面有JR宇都宮線主要車站所通過嘅市區。每一區各有特色。

栃木縣那須鹽原擁有豐富自然景點

那須鹽原有那須連山、溪谷、濕原、高原、溫泉等，自然環境豐富。具代表性嘅觀光景點為「龍化瀑布」，「沼原濕原」及歷史悠久嘅「那須溫泉鄉」，「鹽原溫泉鄉」2大溫泉街。

那須鹽原嘅主要觀光地區可以分為那須、鹽原、黑磯、西那須。今次小編就要為大家介紹各區觀光必去景點！

那須係以那須町為中心嘅地區。呢一帶統稱「那須高原」。有歷史遺跡、主題樂園、大型購物中心、那須溫泉鄉等各式觀光景點。其中，那須溫泉鄉係一個擁有1300年以上悠久歷史嘅溫泉鄉，聚集眾多酒店及商鋪。

鹽原係那須鹽原市以西，以「鹽原溫泉鄉」為中心嘅地區。鹽原溫泉鄉擁有1,200年以上嘅悠久歷史，各式旅館同餐廳林立。仲有全長60米，全日本最大規模嘅足浴設施—「湯布之里」。另外，鹽原地區有「龍化瀑布」等10個以上嘅瀑布、12座吊橋，以及鍾乳洞等大自然觀光名勝。

黑磯指嘅係從JR宇都宮線「黑磯站」乘搭巴士約30分鐘車程以內到嘅地區。有「沼原濕原」、「乙女瀑布」等雄偉自然景觀。仲有幾間住宿設施集中喺板室溫泉街。板室溫泉靠近「那阿川」河，可以體驗獨木舟、河川戲水、行山等活動。

西那須野指嘅係從JR宇都宮線「西那須野站」搭乘巴士約20分鐘車程以內到達嘅地區。觀光重點有建立於明治時代嘅山莊別墅、神社、博物館等歷史人文景點，仲有可以接觸動物同乘坐熱氣球嘅「那須千本松牧場」。千本松牧場内有附設足浴嘅日歸溫泉「千本松溫泉」（不提供住宿嘅溫泉設施），有時間嘅話一定要體驗一下啦！

那須鹽原代表性嘅美食係「附湯炒麵（スープ入り焼きそば）」同「TOTE燒（とて焼き）」。前者為加入醬油味湯汁嘅日式炒麵，而後者係以雞蛋同牛奶製成嫩滑外皮，夾入忌廉同水果，或蕎麥麵同肉等食材作為內餡嘅小食，睇落似可麗餅，但口感唔同，比較鬆軟。

大部分餐廳集中喺市區、鹽原地區同那須地區。

那須鹽原嘅住宿設施集中喺JR東北新幹線、宇都宮線沿線嘅市區，以及各觀光地區嘅溫泉街。市區同那須地區比較多酒店，而鹽原同黑磯地區則較多溫泉旅館。

從東京出發嘅話，先從東京站乘搭JR東北新幹線，約1小時10分鐘抵達「那須鹽原站」。由於各觀光地區離那須鹽原站有一定距離，要去其他觀光景點就要另外轉搭當地電車或巴士。

景點名稱：那須鹽原（那須鹽原駅）
地址：栃木縣那須鹽原市大原間561
交通方式：從東京站乘搭東北新幹線約1小時10分鐘抵達
是否提供Wi-Fi：有（免費 Wi-Fi：那須鹽原市觀光振興中心，道之站「明治之森・黑磯」）
對應語言：中文、英文、韓文
可否使用信用卡：VISA, MasterCard, JCB, AMERICAN EXPRESS, Diners Club International（根據各設施而定）