「東武世界廣場」係一座好似「小人國」嘅主題樂園，以1:25嘅比例複製世界各地嘅知名建築同世界遺產，每件模型都講究細節且做得非常逼真。另外，園區內仲有好多餐廳同紀念品商店，可以安排玩一整日呀。
進入東武世界廣場就如去一趟環遊世界旅行
東武世界廣場位於栃木縣日光市嘅鬼怒川溫泉地區，係一座以1:25嘅比例重現世界建築嘅博物館。展出包括47個世界遺產在內嘅102座世界各地知名建築。從建築物到景中人物模型嘅表情同動作，都相當講究細節且做得栩栩如生。更值得留意嘅係園區嘅建築物模型場景中，設置咗好多神態各異嘅小人偶，數量居然多達14萬隻。 （截至2019年5月資訊）
東武世界廣場內園區特色
園內共分成六個區域：日本園區、現代日本園區、美國園區、歐洲園區、亞洲園區同埃及園區。 夢想去環遊世界但難以實現的話，嚟到呢度就好似可以一日之內環遊世界咁。
以下為你介紹東武世界廣場嘅參觀重點。
日本區及現代日本園區
日本園區・現代日本園區內有大量建築模型，從京都嘅清水寺等歷史悠久嘅寺廟，到東京晴空塔等現代建築都可以一次過睇唒。
其中，東京車站嘅逼真程度更驚人。唔只建築物模型精巧，甚至連電車上嘅乘客人偶，都做得栩栩如生。透過精緻嘅模型，你可以感受得到東京車站車水馬龍嘅景象。仲有好值得一睇嘅係車站模型中1:25比例大小嘅時鐘，實際上真係會郁㗎！
紐約市區造景
美國園區內嘅紐約市區造景都係一定要去睇㗎。雖然係微縮嘅尺寸，但紐約嘅世貿雙子星大樓同紐約帝國大廈嘅模型都居然比普通人高，夠唒震撼！另外，喺市區街道上行人同汽車來來往往，生動地重現熱鬧嘅紐約街景。
吳哥窟造景
亞洲園區內值得注目嘅係世界遺產「吳哥窟」神廟。佢係柬埔寨吳哥窟遺跡之中最大嘅寺廟。模型重現同吳哥窟建築嘅石頭一樣有厚重感。
巴黎鐵塔
歐洲園區嘅亮點當然係法國世界遺產—巴黎鐵塔啦。模型尺寸約13米，精巧重現鋼鐵組成嘅鐵塔結構。
東武世界廣場嘅營業時間與票價
東武世界廣場嘅營業時間，分開3月中至11月係09:00至17:00，而12月至3月中係09:30至16:00。票價方面，一日券係2,800円。購票時出示「日光廣域周遊券（NIKKO PASS all area）」即可享1,000円折扣。「日光廣域周遊券」可喺四日內搭淺草往返日光嘅東武火車各一次，以及喺日光指定範圍嘅車站無限次數上落東武巴士。(截至2019年5月資訊)
從成田機場出發去東武世界廣場
如果搭飛機到東京成田機場直接去東武世界廣場，首先喺成田機場搭特急列車，大約1小時20分鐘到達新宿站。再從新宿站搭「前往鬼怒川溫泉方向」嘅特急列車，車程約2小時，於「東武世界廣場站」落車。
景點資訊
- 景點名稱：東武世界廣場
- 地址：栃木縣日光市鬼怒川溫泉大原209-1
- 交通方式：從成田機場搭乘JR前往新宿站約1小時20分鐘，再轉乘直達列車，車程約2小時，於「東武世界廣場站」落車
- Wi-Fi：有（TOBU FREE Wi-Fi）
- 各國語言對應：中文、英文、韓文、葡萄牙文。從2019年夏天開始，新增泰文。
- 購票方式：現場購票窗口、便利商店購票
- 信用卡：可使用JCB, VISA, Diners Club International, 銀聯卡
Comments