位於成田機場旁嘅「航空科學博物館」，係以日本嘅航空飛行作為主題嘅展示博物館。喺戶外展示場展示實際嘅飛機同直升機。操控室同模擬器等體驗專區都相當受歡迎。喺呢度可以學習到難得接觸到嘅航空歷史，對航空界有興趣嘅就不容錯過喇。
鄰近成田機場的日本「航空科學博物館」
「航空科學博物館」係以日本嘅航空界作為主題嘅博物館。1989年於成田機場旁建設開館，館內展示好多同日本嘅航空界有關嘅豐富展品，並且展示實際嘅飛機或模型、體驗專區等等，透過珍貴嘅資料可以學習到有關日本航空界嘅二三事。更設有可以眺望成田機場嘅展望台，都幾多嘢睇同玩嘅博物館嚟㗎。直至2019年8月左右為止進行維修翻新工程，一部份展區暫停開放。
「航空科學博物館」嘅推薦看點
航空科學博物館嘅推薦之處係可以體驗到實際機體嘅展示。喺戶外展示區，擺放著實際使用過、退役嘅大型客機，仲可以喺指導員陪同下一齊進入機內參觀。館內展示則有機內導覽之旅（額外收費，500円）同噴射機駕駛艙體驗（免費）、仲有飛行員訓練用模擬器體驗（額外收費，100円）。需要喺服務櫃台拎入場券，但因為好受歡迎，小心好快就滿額啦，所以建議一入館就即刻去櫃台報名就最好。透過呢啲活動，可以體驗到試做飛行員嘅感覺，難得有機會不妨試吓啦。
成田「航空科學博物館」入場須知
航空科學博物館嘅開館時間係上午10點至下午5點（入館至4點30分為止）。休館日為毎週星期一（若星期一遇到假日嘅話則為隔日休館）以及年尾嘅12月29日至31日 。但係7月21日至8月31日為止嘅暑假期間並無休館日。入館門票費用為成人500円（2019年8月1日起改為700円）、中學生300円、兒童（4歲以上）200円。館內設有餐廳，食飯時背景係成田機場同飛機，可以影相呃LIKE呀！喺紀念品商店則有各種充滿魅力嘅航空相關商品。
去航空科學博物館的交通方式
因為航空科學博物館好近成田機場，過去都好輕鬆方便。如果從成田機場第一航廈出發的話，從「成田機場第1航廈1樓30號乘車處」搭「往JR成田站方向」嘅JR東關東巴士，搭到「航空科學博物館」落車；如果從成田機場第二航廈出發，就從「成田機場第2航廈1樓28號A乘車處」搭成田機場交通嘅博物館線（平日：經過博物館、往南三里塚方向；星期六、日及日本公眾假期：往航空科學博物館方向），到「 航空科學博物館」落車。
景點資訊
- 名稱：航空科学博物館
- 地址：千葉縣山武郡芝山町岩山 111-3
- 交通方式：搭乘成田機場交通 博物館線（平日：經過博物館、往南三里塚方向，週六日及假日：往航空科學博物館方向）至成田機場 航空科學館下車。
- Wi-Fi支援：沒有
- 語言：僅有日語
- 門票：於售票機購買
- 信用卡支援：無法使用
Comments