最愛日本士多啤梨！原來栃木縣係全日本產量第一？

栃木縣擁有好多自然、歷史景點，同時亦係一個溫泉地，非常有魅力。另外，大家可能唔知，原來栃木縣嘅士多啤梨產量係全日本第一，其他農作物都好豐裕添！

栃木縣有多個旅遊觀光地方

栃木縣分為日光、那須、中央、南部、東部5大地區。其中，日光、那須、東部地區自然豐饒，坐擁鬼怒川溫泉及那須塩原溫泉等名勝。而中央、南部地區則有宇都宮等都市。

栃木縣氣候有內陸型氣候嘅特征。夏天氣候不穩定，容易產生變化；而冬天則一日溫差變化較大。所以春天同秋天係最佳觀光季節。春天時可以去賞櫻名勝欣賞櫻花綻放；秋天時，則可以喺日光、那須等欣賞山頭紅葉。

栃木縣除咗有世界遺產、國家重要文化財等人文景點，仲有國立公園等自然景點。今次就為大家介紹一下去遊栃木縣就一定要去嘅推介景點啦。

如果你好鐘意大自己咁去栃木縣觀光就啱唒喇！位於南部嘅足利花卉公園近年好出名，因為可以睇到罕見嘅八重瓣「紫藤棚」係最大特色。另外喺日光國立公園亦有湖畔、瀑布、濕原等大自然絕景。作為避暑勝地而聞名嘅那須高原亦非常推薦呀。

如果對具有歷史性嘅建築物有興趣，咁就可以去栃木縣嘅日光地區，當中有好多歷史悠久嘅寺廟神社、城跡等。而且日光嘅神社、寺院建築群被認定為世界遺產。當中最具代表性嘅係「日光東照宮」，主要為祭祀江戶幕府初代將軍「德川家康」神格化後嘅神明「東照大權現」。東照宮絢爛奪目嘅正殿建築是其特色。

栃木縣有好多名產美食。例如係栃木和牛、宇都宮牛等日本品牌牛、餃子、拉麵、日式炒麵等日本料理；各種水果、白米、蔬菜等農產品都好出名。喺宇都宮市大部分地區都可以食到各種美食，而各觀光地區主要車站附近都有多間餐廳。

栃木縣嘅士多啤梨生產量為日本第一，係士多啤梨人氣品牌「とちおとめ（栃乙女）」嘅原產地。喺多個農園都可以體驗「摘士多啤梨」活動，30分鐘內可以任食又甜又正嘅士多啤梨！

宇都宮係栃木縣嘅縣廳所在地。又一個你可能唔知嘅日本第一都喺呢度！宇都宮呢個地方嘅餃子消費額係日本全國數一數二嘅，所以被稱為「餃子之街」。宇都宮車站附近同市內各地都有好多餃子專門店，從一般餃子到變化多端嘅口味都有，鐘意食餃子嘅你去到一定要試吓唔同餐廳餃子啦！

宇都宮站及日光站等主要車站附近嘅住宿設施都非常齊全。從酒店、旅館到民宿等形態都有，特別中央地區嘅酒店分佈最密集。另外，鬼怒川溫泉、那須塩原溫泉等地都有好多溫泉旅館。而那須地區嘅高原地帶，更係聚集咗各種度假酒店同山莊別墅，可以過去輕鬆渡假！

要去個「栃木縣之旅」，可以首先以JR宇都宮站為出發起點，從東京站搭東北新幹線約50分鐘就到。之後再喺JR宇都宮站轉車搭當地列車就最方便快捷喇。