日光「華嚴瀑布」被譽為日本三大名瀑布之一，亦係日光眾多瀑布中，最有名氣！華嚴瀑布從高處岩壁傾瀉而下，聲勢浩大，遊客總係絡繹不絕。去到華嚴瀑布，仲可以順便去埋附近嘅中禪寺湖等人氣景點觀光添！
日本三大名瀑之一的華嚴瀑布
位於栃木縣西部「奧日光」嘅華嚴瀑布，高97米，寬7米。瀑布嘅成因係由於中禪寺湖水壓好大，造成湖底漏水，水流下山谷而形成瀑布。瀑布從將近一百米咁高嘅地方流落嚟，睇落就好似從天邊傾瀉而下嘅天上之水，吸引眾多日本國內外觀光客去朝聖，係奧日光必去嘅景點之一。春天、夏天綠意盎然；秋天有色彩絢麗的紅葉美景；冬天則可以欣賞結冰瀑布同雪景。氣勢如虹嘅華嚴瀑布，隨著四季變化，不同的景色總能令人感嘆大自然的美。
日光華嚴瀑布的看點
中禪寺湖嘅湖水以每秒三噸嘅流量，從97米嘅大岩壁傾瀉而下，形成氣勢磅礡嘅「華嚴瀑布」。 春天有杜鵑、櫻花爛漫綻放；夏天有鬱鬱蔥蔥的景緻，除除涼風加上瀑布濺起嘅水珠係消暑良方。一大早去，如果好天甚至有機會可以睇到瀑布附近產生嘅彩虹添！
秋天瀑布嘅水量最多，可以感受瀑布最磅礡嘅氣勢。瀑布周圍嘅樹木從10月中旬開始變色，秋天可以同時欣賞美麗嘅紅葉同瀑布。冬天，落雪之後，氣溫低嘅晨早，仲可以睇到霧冰添（於寒冷環境下，空氣中嘅水分同霧將樹枝凍結形成嘅現象）。最嚴寒嘅時期係1月底至2月底，瀑布會結冰，形成懸吊嘅冰柱，就好似冰造嘅吊燈，畫面非常壯觀。而比較細嘅瀑布凍結後會產生藍冰，感覺更奇幻！
欣賞華嚴瀑布的最佳地點
華嚴瀑布附近有設置免費雙層觀景台，亦可以付費搭電梯到最底層觀賞瀑布，近距離感受氣勢十足嘅瀑布之美。電梯來回票價為大人（中學生或以上）550円、小學生330円、小學生以下免費。營業時間為08:00～17:00（12月1日至2月28日為09:00～16:30。根據季節有所調整。）
去華嚴瀑布嘅交通方式
從東京出發的話，從東京站乘搭新幹線前往宇都宮站，轉搭JR日光線到日光站。再喺JR日光站或東武日光站乘搭「往中禪寺溫泉方向」嘅東武巴士（約40分鐘），於「中禪寺温泉」落車，徒步約5分鐘抵達。
景點資訊
- 景點名稱：華嚴瀑布升降機
- 地址：栃木縣日光市中宮祠2479-2
- 交通方式：於JR日光站或東武日光站乘搭往中禪寺溫泉嘅東武巴士（約40分鐘），於「中禪寺温泉」落車，徒步約5分鐘抵達
- 是否提供Wi-Fi：沒有
- 對應語言：僅限日文
- 購票地方：當地購票處
- 可否使用信用卡：不支援
Comments