戶倉上山田位於長野縣千曲市內，係一個擁有超過120年歷史嘅溫泉鄉，有各式旅館、餐飲店、禮品店、工藝品店林立，自古營業至今嘅老鋪都有好多。
戶倉上山田溫泉鄉嘅一日遊行程
戶倉上山田溫泉係集「戶倉溫泉」、「上山田溫泉」及「新戶倉溫泉」嘅總稱。其中以戶倉站至千曲川之間嘅戶倉溫泉同上山田溫泉係比較繁榮觀光地帶。
另外，喺約100年前開始，當地人就會喺善光寺做完法事後去浸溫泉，於是漸漸發展成為溫泉街。所以有好多人一日遊嘅行程都會包括參拜善光寺、城山史跡公園「荒砥城跡」同觀音寺等，最後去埋戶倉上山田浸溫泉！
戶倉上山田嘅推薦景點
嚟到戶倉上山田溫泉，就推薦你一定要去埋充滿懷舊氣氛嘅溫泉街行吓啦！除咗有旅館、餐飲店、足湯設施，仲有可以體驗射擊、陶藝工作坊、花窗玻璃製作等活動。
另外，戶倉上山田溫泉一帶有以唱歌、跳舞、演奏日本樂器三味線等藝妓表演而聞名。仲有提供由藝妓幫手著和服嘅有趣體驗添！徹底感受日本傳統藝道之美。
戶倉上山田推薦美食＆餐廳
戶倉上山田溫泉街有日式、西式、中式料理等餐廳，尤其以戶倉溫泉地區一帶最多餐廳。另外，經戶倉上山田溫泉中央嘅千曲川沿岸一帶，有可以採摘提子或蘋果嘅果園，即摘即食，鮮甜美味！
戶倉上山田嘅酒店、旅館
去遊戶倉溫泉同上山田溫泉，就梗係入住溫泉酒店旅館浸返夠本啦！雖然根據住宿內容價錢有平有貴，但平均都係10,000円左右起，對比起長野縣其他溫泉鄉，都算係經濟實惠喎！
去戶倉上山田嘅交通方式
首先可以喺東京市區搭車去咗長野先，再喺長野站搭信濃鐵道約25分鐘就到「戶倉站」就可以行去溫泉街。
景點資訊
- 景點名稱：戶倉上山田（戶倉站）
- 地址：長野縣千曲市大字戶倉1445
- 交通方式：於長野站乘搭信濃鐵道約25分鐘
- 是否提供Wi-Fi：有（Chikuma-Free-Wi-Fi-2）（千曲市戶倉創造館, 根據各旅館而定）
- 對應語言：英文
- 購票地方：各特定車站
- 可否使用信用卡：VISA, MasterCard, JCB, AMERICAN EXPRESS, Diners Club International（根據各施設而定）
Comments