去舊輕井澤的別墅氣氛下悠閒購物

舊輕井澤係日本首個建造山莊別墅嘅地方，其後發展成日本首屈一指嘅度假勝地。近年舊輕井澤嘅購物景點同美食都漸漸豐富充實，成為熱門嘅旅遊地。

舊輕井澤即係指邊度？

舊輕井澤指嘅係輕井澤以北嘅地區。明治時代由外國人宣教師於輕井澤建造別墅為契機，漸漸發展為渡假勝地。夏季涼爽嘅天氣非常適合避暑。別墅與周圍自然景色結合、充滿療癒感。

舊輕井澤旅遊魅力豐富，今次要同大家介紹去邊玩好！

「舊輕井澤銀座通」係以舊輕井澤為中心，一條約800米嘅商店街。工藝品、服飾、雜貨、禮品、餐飲、麵包店等各式店家林立。另外，輕井澤車站附近仲有知名OUTLET「輕井澤王子購物廣場」，舊輕井澤一帶同埋呢個OUTLET仲滿足唔到你購物嘅慾望？！

舊輕井澤留存眾多具歷史性嘅建築物。例如喺1906年開業嘅高級酒店「舊三笠酒店」，歷史悠久嘅建築物現今被指定為國家重要文化遺產，可以進入館內參觀。

大自然豐富嘅舊輕井澤，仲有以紅葉勝地聞名嘅「雲場池」、常綠針葉樹林立嘅「舊高爾夫通」、相思樹林蔭道「私語小路（ささやきの小路）」等自然觀光景點俾你悠閒渡假。

舊輕井澤嘅美食名產豐富，餐飲店選擇眾多。

舊輕井澤銀座通有好多日式、西式餐廳同咖啡店等。喺日式餐廳可以食到著名嘅信州蕎麥麵，信州三文魚等長野名產美食。

推薦喺舊輕井澤銀座通邊行邊食。老舗咖啡店嘅「咖啡味軟雪糕」、即炸「炸肉餅」、以核桃及黑糖攪拌而成嘅日式麻糬「Chimoto餅（ちもと餅）」等眾多小食，留個肚去「掃街」都唔錯呀！

輕井澤站附近及車站北面，都有各式各樣嘅住宿設施可以選擇。除咗歷史悠久嘅老牌酒店，嶄新酒店，仲有山莊別墅，天然溫泉旅館等應有盡有。

想住喺較新淨、設計新穎嘅酒店，可以考慮一下奢華嘅「舊輕井澤KIKYO 希爾頓格芮精選酒店」，同埋客房內附設露天溫泉嘅「輕井澤萬豪酒店」等。

如果想體驗住喺具代表性且歷史悠久嘅酒店，推薦「萬平酒店」或「舊輕井澤音羽之森飯店」（旧軽井沢ホテル音羽ノ森）呀。

要去舊輕井澤，首先就要搭去「輕井澤站」。從東京站出發的話，搭北陸新幹線，只需要約1小時10分鐘就到！另外，亦可以從東京站搭高速巴士，雖然車程約3小時，但車費方面比新幹線平一半㗎！