松本有好多名產美食，大部分都可以喺日式餐廳食到。松本西面有日本阿爾卑斯山，東面為美原高原，喺優越嘅氣候同大自然環境下，孕育出品質好嘅食材，所以以其製作嘅各種名產美食都係一大特色。今次小編就要同大家介紹去到松本必食嘅4大名產。
松本當地名產美食
松本市名產有蕎麥、馬肉、味噌、日本酒、蘋果、山野菜等。好多日式料理店都聚集喺松本站或松本城附近，全部都係活用當地食材帶出原汁原味嘅美食料理。
松本名產①山賊燒
「山賊燒」係一款好有代表性嘅松本美食。以特製醬汁醃製雞脾或雞胸肉，再塗上太白粉油炸而成。所謂嘅特製醬汁係成功關鍵！將胡椒、蒜、洋蔥、薑等攪拌混合而成。喺松本嘅日本定食餐廳、居酒屋等都可以食到。而其中以「千石」，「松本炸雞中心（松本からあげセンター）」最受歡迎。
松本名產②投汁蕎麥麵（とうじそば）
「投汁蕎麥麵」係松本市西南部奈川地區嘅一種郷土料理。湯係以當造蔬菜、菇類熬煮而成嘅高湯，食嘅時候將蕎麥麵放入用名為「投汁勺」嘅傳統竹勺子，再將勺子放入熱辣辣嘅蕎麥麵湯鍋內，好似打邊爐咁整返熱佢嚟食，冬天時食特別暖笠笠！奈川地區嘅投汁蕎麥麵名店以「蕎麥之里 奈川（そばの里 奈川）」同「福傳（福伝）」出為出名。
松本名產③「蕎麥糕」（そばがき）
「蕎麥糕」（そばがき）係一種以蕎麥粉製作嘅傳統小食。將蕎麥粉加入熱水並揉成餅狀。同一般水煮嘅蕎麥麵相比，蕎麥糕嘅「蕎麥味」更香更濃郁。蕎麥糕有多種食法，例如有放喺紅豆沙內，可以當甜品咁食。提供蕎麥糕嘅名店有「女鳥羽蕎麥」，「種村」等比較出名。
松本名產④地酒
「地酒」係指採用當地原料所生產嘅酒 。松本有品質優良嘅大米同淨水，加上氣候適宜釀酒，所以有好多酒窖。酒窖裡面可以參觀，亦可以試喝。日本酒専門店「廚 十兵衛」、居酒屋「Shinzan（しんざん）」 等都可以品嚐到松本當地嘅地酒。
睇完係咪都好想即刻食到呢？ 事不宜遲，即刻mark低啦！
Comments