去中輕井澤嚟個文青之旅！

中輕井澤位於長野縣輕井澤嘅中央位置。以中輕井澤站為起點，主要係北面方向延伸嘅各種觀光景點。

中輕井澤有啲咩㗎？

中輕井澤有各式各樣嘅觀光景點、餐飲店、住宿設施、購物景點等人氣景點。特別係中輕井澤以北，一片靜謐嘅森林世界都好適合遊客優閒地渡假。自然環境豐饒，充滿各種觀光景點，仲聚集咗好幾個溫泉地添。

喺輕井澤有好多美術館，其中3間位於中輕井澤。展出日本國內外現代美術作品嘅「Sezon現代美術館」、展出日本人畫家作品嘅「田崎美術館」及「輕井澤千住博美術館」。一於嚟個美術館巡禮嘅「文青之旅」！

中輕井澤仲有好幾條健行郊野路徑，例如有途經「千之滝」瀑布等自然景觀嘅散步路線、由森林導覽員「Picchio」帶領嘅森林導覽，可以一邊散步，一邊觀察野鳥及野生動植物，盡情投入大自然嘅世界。

另外，中輕井澤亦有塩壺溫泉、千之滝溫泉、星野溫泉等溫泉地。就算唔係住喺嗰度都可以付費使用佢嘅溫泉設施，推薦玩完一日浸個靚溫泉舒解疲勞呀。

如果要搵嘢食最好去中輕井澤車站北面，附近有多間餐飲店，日式、西式、中式、拉麵等應有盡有。另外，喺溫泉區都有好幾間餐廳，浸完溫泉舒舒服服咁食飯真係諗起都覺得嘆呀！

住宿設施以中輕井澤站以北為主，而且附有溫泉設備。住宿種類從山莊別墅、民宿、日式旅館、酒店等都有。例如有「輕井澤星野溫泉」或「鹽壺溫泉酒店」等溫泉旅館，仲可以一邊浸露天溫泉，一邊欣賞大自然景色！

首先可以從東京、名古屋、大阪等各地搭新幹線或巴士去到JR輕井澤站先，再轉搭「信濃鐵道」約4分鐘就到中輕井澤站。另外，可以喺長野站搭高速巴士都去到中輕井澤站。