長野縣嘅餐飲美食集中喺長野站等主要車站或各觀光地區。特別係日式料理店，以長野豐饒自然所孕育嘅食材，製作一道道名產美食。今次小編就要為大家介紹長野縣嘅5大必食美食。
長野當地名產美食
長野被日本北阿爾卑斯山環繞，豐饒嘅大自然環境，孕育出各種名產美食。其中最出名嘅有蕎麥麵、芥末（WASABI）、蘋果、栗子、野澤菜等蔬果，仲有以牛、馬、雞肉等肉類料理。
信州蕎麥麵
「信州蕎麥麵」使用咗大量長野產嘅優質蕎麥製成。根據唔同區域有唔同種類嘅蕎麥麵，例如戶隱地區有以傳統手法製成嘅「戶隱蕎麥」；奈川地區有喺蘑菇及山野菜嘅湯汁內放入蕎麥麵嘅「投汁蕎麥」；木曾地區有蕎麥麵上放入經過乳酸發酵嘅漬物嘅「すんきそば」等。
以車站附近嘅日式料理店，甚至去到長野縣各處都可以食到信州蕎麥麵。另外，推薦位於姨捨嘅「Sarashina no Sato（さらしなの里）」，戶隱嘅「Uzuraya（うずら家）」等，長野縣咁大，去到各地都試吓可能試到唔同風味呢。
長野名物 OYAKI (おやき)
「OYAKI」係長野嘅郷土料理。外皮由小麥粉同蕎麥粉製成，內餡包著長野醃漬名産「野澤菜」、豆沙餡、南瓜等應有盡有。可以一路行一路食，當食個下午茶都好呀。喺車站、手信禮品店、日式料理店等都可以搵到佢嘅蹤影。想慢慢品嚐嘅話，推薦去長野市「IROHA堂（いろは堂）」同安曇野市「AZUMI堂（あずみ堂）」等名店。
長野產「信州牛」
「信州牛」係長野品牌牛。以長野縣名産蘋果等當地食材餵食嘅信州牛，具有芳醇香味及柔嫩口感。信州牛料理有壽喜燒、Shabu Shabu（涮涮鍋）、牛扒等，邊種食法都超好味！
長野縣內大部分店鋪都有提供，而當中特別推薦位於長野市嘅信州牛専門店「SUKI亭（すき亭）」，「長野大都會大飯店」嘅餐廳等。
一直流傳 馬肉刺身
長野自古就有食用馬肉嘅習慣，以「馬肉刺身」料理聞名。食用方法有生食、製成壽司、壽喜燒等應有盡有。想喺長野縣食馬肉刺身嘅話，可以去松本市馬肉専門料理店「新三YOSHI（新三よし）」，或去長野市食到馬肉稀少部位嘅「BANIKUMAN」等。
香甜美味 蘋果甜品
蘋果係長野縣嘅特産。長野產嘅蘋果水分飽滿，香氣醇厚，非常適合用嚟整成甜品。長野縣內有好多餐廳可以食到蘋果派、蘋果啫喱等甜品。另外，亦推薦以長野產蘋果所製作嘅和菓子，例如係二葉堂嘅「蘋果小饅頭（おりんごまんじゅう）」，柳屋嘅「中央的蘋果（りんご最中）」等，係日本獨有嘅銘菓嚟㗎。
Comments