乘鞍係位於長野縣同岐阜縣交界嘅山岳地帶。有高原、湖畔、溫泉等，大自然景點豐富。
「北阿爾卑斯」乘鞍擁有豐富大自然美景
乘鞍位於飛驒山脈（北阿爾卑斯山脈）南部乘鞍嶽東側嘅地區。而「乘鞍岳」係由23座山峰、7個湖泊、8片平原所構成嘅高原地帶之統稱，其中最高峰嘅「劍峰」為海拔3,026米，呢個地區有滑雪場、溫泉鄉、瀑布、湖泊等各種大自然景點，無論登山定觀光，一年四季都有好多人去乘鞍，係一個暫時未被廣為人知嘅秘景。
乘鞍有咩好玩？
於佔地廣闊嘅乘鞍地區有各種具魅力嘅觀光景點。今次小編就要為大家介紹乘鞍好玩之處。
去乘鞍高原浸溫泉，感受大自然
乘鞍高原嘅溫泉鄉有代表性乳白色嘅溫泉泉水，去日歸溫泉設施「湯煙館（湯けむり館）」可以輕鬆浸返個靚溫泉！而乘鞍高原附近有著名、三個瀑布為一體嘅「三本滝」，夏天可以欣賞氣勢磅礡嘅瀑布流水；冬天時結咗冰嘅巨大水柱更為壯觀！而且有「Mt.乘鞍滑雪度假村」，入住附近眾多住宿設施仲可以享有滑雪纜車券優惠添！
白馬乘鞍溫泉滑雪度假村等優質滑雪場
乘鞍內有「白馬乘鞍溫泉滑雪場」、「Mt.乘鞍滑雪度假村」等滑雪度假村。由於長野縣地勢偏高，雖為內陸地區，但氣溫一般比較低，冬天時經常落大雪，為滑雪場提供充足天然積雪，與北海道媲美嘅優質粉雪更吸引日本國內外嘅滑雪愛好者去滑單板或雙板滑雪。
雪壁絕景「乘鞍Skyline」
除咗立山黑部有高牆雪壁，原來乘鞍都有。「乘鞍Skyline」係一條連接平湯溫泉同乘鞍嘅雪壁公路。乘鞍高原每到冬天，大量積雪覆蓋大地，就要出動剷雪車開路。道路兩旁形成高聳嘅雪壁，有「雪之迴廊」之稱。日常生活中難以想像嘅雪壁，高約5至10米，係一般人身高嘅好幾倍！乘搭山岳巴士穿梭雪牆，體驗被雪壁包圍嘅感覺，真係魄力十足！
於乘鞍岳體驗踩單車、登山等郊外活動
乘鞍岳有各種不同難易度嘅登山健行路線，從初階到進階都有。途中會經過瀑布、湖泊、神社等景點，可以順道觀光一下。另外，推薦可以喺乘鞍觀光中心租借單車，一邊踩單車，一邊欣賞眺望沿途美麗山景。到秋天山頭一大片紅黃楓葉，醉人美景更令人嘆為觀止！到春、夏天更有單車比賽同馬拉松比賽可以挑戰吓添！
去乘鞍享受信州美食
乘鞍當地最出名嘅美食當然要食蕎麥麵同山賊燒啦。無論係住宿提供嘅膳食套餐定係日式料理店都唔好錯過呢2款美食呀。
乘鞍的酒店、旅館住宿
乘鞍內有日式溫泉旅館、山莊別墅、休閒式民宿、Guesthouse等各式各樣嘅住宿設施。大部分聚集於乘鞍觀光中心附近。由於坐立於溫泉地帶，好多住宿都附有溫泉設備，或者有露天溫泉，冬天一邊望住雪景同星空，一邊浸溫泉真係好極致嘅享受！
從東京出發去乘鞍嘅交通方法
從東京出發嘅話，可以選擇搭巴士或電車去到松本車站再轉車。巴士的話，喺新宿高速巴士總站搭高速巴士約3個鐘到松本站；電車的話，喺新宿站搭JR特急列車，最快約2小時40分鐘到松本站。如果有買電車周遊券的話搭電車比較抵，如果無買就巴士會比較平同快㗎！
到松本站後搭30分鐘電車到新島島站（新島々駅），再轉搭巴士約1小時20分鐘到達乘鞍觀光中心。
景點資訊
- 景點名稱：乘鞍（乘鞍觀光中心）
- 地址：長野縣松本市安曇4306-5
- 交通方式：從新島島站乘搭巴士1小時20分鐘
- 有無提供Wi-Fi：有（根據住宿設施而定）
- 對應語言：僅限日文
- 可否使用信用卡：不支援
Comments