去長野縣山之内，享受雄偉自然嘅溫泉度假村！

山之内係一座位於長野縣北面嘅小鎮。係一個擁有海拔2,000米以上嘅高山、高原嘅溫泉鄉，被豐富自然環境包圍。

長野縣山之內町係邊度嚟？

山之内位於上信越高原國立公園嘅中心。自然環境豐富，有山林、花花草草、高原等，可以欣賞絕景嘅同時參加各種喺自然環境下進行嘅休閒活動。

山之内劃分為志賀高原、北志賀高原、湯田中澀溫泉鄉，3個觀光地區。仲有受到日本國內外遊客歡迎嘅「地獄谷野猿公苑」都係一個不容錯過嘅觀光景點。

志賀高原係一個擁有超過10個滑雪場嘅滑雪聖地。滑雪場往年都係11月中至下一年5月營業。滑雪期間較長為其特徵。另外，志賀高原內仲有多個溫泉地。

北志賀高原坐擁龍王山、五輪山、高社山等高山，所以有多條登山路徑。其中通往龍王山山頂嘅「龍王空中纜車」更加係全日本最大嘅纜車，可同時容納166人。從空中纜車可以一次過望到日本北阿爾卑斯山脈、北志賀高原群山。秋天仲可以俯瞰一整片紅葉絕景！

湯田中澀溫泉郷共有9個溫泉街。最具代表性嘅係「湯田中」及「澀」溫泉。「湯田中」位於湯田中澀溫泉鄉嘅玄關口「湯田中站」。車站前、及往溫泉鄉方向嘅沿途都設置咗「足湯」，可以輕輕鬆鬆浸吓行到攰嘅雙腳。而「澀」溫泉地於1900年代建成，以木造建築同石板街造成嘅溫泉街充滿懷舊感覺，散發莊嚴氣氛。

地獄谷野猿公苑位於湯田中溫泉郷地區，係一個可以近距離觀察野生雪猴嘅地方。冬天時浸溫泉嘅雪猴係呢度嘅一大特色，仲好出名添！

山之内町嘅名產係水果，例如蘋果、櫻桃、藍莓、提子等。鍾意日本水果嘅你可以去搵嚟食啦！喺山之内地區嘅餐廳就可以食到，或者參加各個農場嘅摘水果活動，摘完即刻食，更鮮甜美味！

山之内嘅湯田中澀溫泉郷、志賀高原、北志賀高原等主要觀光地區嘅住宿設施都非常完善。湯田中澀溫泉郷地區較多旅館，而志賀高原同北志賀高原地區則係較多酒店。另外，志賀高原嘅酒店大多附設天然溫泉。

從東京出發嘅話，先從東京站搭北陸新幹線，抵達長野站後搭電車或巴士就可以去到「湯田中站」、「志賀高原」各觀光據點。