輕井澤：日本人氣避暑勝地

輕井澤位於長野縣東北部，係一個結集山莊別墅同酒店嘅熱門度假村。夏天作為避暑勝地聞名全國。另外，觀光景點同美食都非常充實。

關於輕井澤

輕井澤喺江戶時代作為宿場（即古代嘅驛站）所在地而繁榮，直到明治時代之後作為山莊別墅發展而成。現今嘅輕井澤有購物廣場、美術館、餐廳、溫泉等，成為一個聚集各種魅力嘅人氣觀光地區。

輕井澤位於海拔1,000米左右嘅高原地帶。夏天涼快，係日本好出名嘅避暑勝地。而最推薦去嘅觀光季節係5月至7月，而想欣賞紅葉嘅話，最佳觀賞期係9月至10月呀。

輕井澤被劃分為舊輕井澤、中輕井澤、追分同南輕井澤4個地區。今次小編就要為大家介紹當中幾個必去嘅名勝。

「白絲瀑布」係輕井澤必訪嘅人氣觀光景點之一。位於輕井澤北邊嘅山林之中。瀑布高約3米，寬70米，可以睇到地下水沿著蜿蜒曲折嘅岩石陡壁，猶如白絲飛流直下嘅美景。另外，距離輕井澤站較近嘅「雲場池」係一個熱門賞紅葉嘅景點。去到輕井澤真係唔可以唔去！

輕井澤嘅冬季充滿魅力！除咗有「輕井澤王子大酒店滑雪場」等滑雪度假村，仲可以喺「輕井澤冰上公園」等體驗冰壺同溜冰添！冬奧睇得多自己都想試吓玩啦係咪！

輕井澤有眾多購物景點。特別喺「舊輕井澤銀座通」林立多間禮品店同美食餐廳，係輕井澤必去嘅商店街。其他仲有「輕井澤王子購物廣場Outlet」、集結各種雜貨店及餐廳嘅「Harunire Terrace」等。

輕井澤嘅餐廳主要聚集於輕井澤站北面，有日式、西式、Café等各式各樣嘅店鋪。

喺餐廳，除咗可以品嚐到各種人氣甜品，例如咖啡味軟雪糕、輕井澤布甸等，亦推薦購買蘋果牛油果醬、香腸、長野名產「野澤菜」等手信帶返香港。

2000年初，「輕井澤蒸餾所」出產世界知名品牌「輕井澤威士忌」。然而，由於經營困難，於2012年宣布閉廠。喺閉廠前所出產嘅幾百枝輕井澤威士忌，而家都只能夠喺拍賣市場上先買得到喇。

輕井澤聚集咗眾多住宿設施，從歷史悠久嘅高級酒店、室內附露天溫泉嘅客房、距離車站近嘅平價酒店等，可以揀一間最適合自己嘅酒店，仲唔快啲check吓！

推薦從東京站乘搭新幹線前往輕井澤站。約1小時10分鐘就到。另外，價格實惠嘅高速巴士都係一個唔錯嘅選擇。所需時間約為3個鐘，價錢方面比新幹線平一半，為3,000円左右。