被美麗山林所包圍嘅避暑勝地―長野縣輕井澤，有一個 瀑布美景叫做「白絲瀑布」。白絲瀑布係輕井澤其中一個好受歡迎嘅觀光景點。地下水沿著蜿蜒曲折嘅岩石陡壁，猶如白絲飛流而下嘅奇景，唔單止好清涼，仲好治癒添！係一個全年都有好多遊客到訪參觀嘅推薦景點。
關於位於輕井澤嘅「白絲瀑布」
長野縣輕井澤嘅「白絲瀑布」位於充滿綠色風情嘅森林內。瀑布高約3米，寬70米，可以觀賞到地下水沿著岩石陡壁好似「白絲」咁順暢地流落嚟嘅奇景，因而稱為「白絲瀑布」。地下水從岩石表面湧出，水質透明，清澈見底。一年四季都可以觀賞到唔同嘅景色。春天被綠色環繞，夏天時企喺瀑布面前更加係清涼舒服；最推薦秋天去，紅葉映襯下嘅瀑布美景亦係美不勝收！
白絲瀑布嘅特色
白絲瀑布嘅特色為透明度極高嘅泉水從高處流落下嘅景色。細細落下嘅瀑布美景吸引咗好多人前往造訪。被豐富自然環繞嘅瀑布景色，配合四季唔同景色更美如一幅畫。另外，夏季仲會舉行夜間點燈等活動，可以欣賞到同日頭截然不同嘅神秘夢幻景色。
邊行山邊享受大自然
｢信濃路自然步道｣係一條通往白絲瀑布嘅遠足路徑。可以搭巴士從JR輕井澤搭巴士到「峰之茶屋」，就係自然步道嘅起點，從呢度行去白絲瀑布大約係10公里嘅散步路徑。慢慢遊覽嘅話所需時間大約為5個鐘，可以充分享受清幽嘅森林散步，洗滌一下繁忙都市下嘅心靈。而路徑沿途亦設有小賣店，可以食到鹽燒淡水魚、以泉水製成嘅豆腐等當地名產。行過經過就要去試吓啦！
去白絲瀑布嘅交通方式
從東京出發嘅話，搭新幹線到輕井澤後再轉搭「往北輕井澤方向」嘅草輕交通巴士（約23分鐘），到「白絲瀑布」落車行約5分鐘。
景點資訊
- 景點名稱：白絲瀑布
- 地址：長野縣北佐久郡輕井澤町長倉
- 交通方式：於JR輕井澤站搭「往北輕井澤方向」嘅草輕交通巴士（約23分鐘），到「白絲瀑布」落車徒歩約5分鐘。
- 是否提供Wi-Fi :無
- 對應語言：僅限日文
- 入場費：無需要
- 可否使用信用卡：不支援
Comments