冬天喺長野縣內有各種觀光景點。例如有喺雪景襯托下嘅松本城、白雪雪嘅上高地等豐富嘅自然觀光景點。長野縣更係1998年舉辦冬季奧運會嘅地方，可以盡情享受各種冬季運動。另外，呢度仲有好多溫泉鄉，喺寒冷嘅季節嚟到就最啱啦！一於去長野觀光後浸一下溫泉，治療疲倦嘅身心。放個假去旅行就優悠地玩先最好㗎嘛你話係咪？
長野白雪雪嘅冬天
長野縣係一個被豐富自然環境包圍嘅地方。冬季可以隨處都可以欣賞一片雪白嘅美景，仲可以玩到各種冬季運動添！由於長野縣降雪量充足，而且有各種形形色色嘅冬季祭典或季節限定活動等，所以都吸引咗好多觀光客去體驗冬天先有嘅活動同樂趣！
長野喺1998年舉辦過冬季奧運會？
無錯！長野縣喺1998年舉辦過長野冬乎奧運會！當時以長野市為中心，準備好競技會場，吸引日本國內外遊客到訪。當時嘅滑雪場設施等仍然被保留落嚟俾人使用。長野奧運會紀念場館「M-WAVE」係作為當時速度滑冰競技嘅會場。設施內嘅「Nagano Olympic Museum」館內亦有展出長野奧運會中選手所使用過嘅道具同服裝，奧運會原創精品等。而且仲有播放當時影像嘅小劇院、可以模擬體驗雪橇運動等冬季運動，試感受吓長野奧運會當時嘅興奮同感動！順帶一提，入場仲要係免費嘅添！
冬天去長野必玩嘅係？
冬天去長野縣最推薦嘅當然係「滑雪」啦。長野縣內有各個滑雪場都有充足嘅降雪量，加上係優質嘅粉雪而大受歡迎！每一個雪季都吸引來自日本國內外嘅遊客造訪。活用本來山頭嘅形狀而自然地變為滑雪雪道同白茫茫嘅一片群山都係一絕美景！而喺滑雪場附近嘅住宿設施都附溫泉，喺滑完一日雪之後浸吓溫泉舒解疲勞就啱唒啦！
出發去長野嘅交通方式
從東京出發嘅話，喺東京站搭新幹線，到長野站落車。再喺JR長野站附近嘅「長電8號巴士站」搭「往屋島・須坂站方向」嘅巴士（所需時間約20分鐘）喺「M-WAVE（エムウェーブ前）」落車後徒歩約3分鐘即到。
景點資訊
- 景點名稱：長野奧運會紀念場館「M-WAVE」
- 地址：長野縣長野市大字北長池195
- 交通方式：搭長電巴士於「M-WAVE（エムウェーブ前）」落車，徒歩約3分鐘
- 是否提供Wi-Fi : 沒有
- 對應語言：僅限日文
- 入場費：免費
- 可否使用信用卡：不支援
Comments