難得嚟到鎌倉觀光，當然要買返啲當地紀念品帶返香港啦！車站附近可以買到銘菓、雜貨、工藝品等等嘅當地紀念品。今次小編就為大家嚴選出5款推薦紀念品。
去商店街買鎌倉紀念品
鎌倉站附近有兩條商店街，分別為「小町通」同「御成通」。小町通係鎌倉站東口前嘅鳥居延伸至鶴岡八幡宮約360米嘅商店街。而御成通係鎌倉站西口延伸約300米嘅商店街，除咗觀光客，亦有好多當地居民喺度行。兩邊嘅商店街都有賣名產和菓子同傳統工藝品等鎌倉嘅代表性當地紀念品。
推薦手信①鳩SABURE曲奇
「鳩SABURE」係一款牛油味餅乾。剛好嘅硬度令口感札實，散發淡淡嘅牛油甘香味。鴿子外形嘅零食，獨特可愛。呢款和菓子可以喺「豐島屋」買到。
推薦手信②鎌倉八景
「鎌倉八景」係一種喺日式煎餅內加入味噌、蛋黃醬、抹茶、咖喱等味嘅豆類和菓子組合。一盒含有多款口味，非常受歡迎。鎌倉八景可以喺「鎌倉豆之屋」購入。
推薦手信③RAISIN WICH
「RAISIN WICH」係一款夾著提子乾同牛油忌廉嘅西式甜點。提子乾以西洋酒醃製而成，但幾乎感受唔到酒味，所以就唔飲酒嘅人都食得到。味道亦唔會太甜、係一種深受大眾歡迎嘅鎌倉銘菓。可以喺「鎌倉小川軒」買到。
推薦手信④南瓜金鍔燒
「南瓜金鍔燒」係以麵皮將南瓜餡同紅豆包製而成嘅和菓子。南瓜嘅甘甜味同帶有鹹味嘅紅豆擺埋一齊非常夾。另外，同款商品仲有其他口味，例如有抹茶、黒芝麻、芋頭等。顏色分明嘅「南瓜金鍔燒」可以喺「鎌倉ITOKO」買到。
推薦手信⑤鎌倉彫
「鎌倉彫」係一款鎌倉傳統工藝品。於桂樹，銀杏木上雕刻圖樣、再喺上面上漆。圖樣為工匠逐一手工雕刻製成，所以價錢亦比較昂貴，大約10,000円左右起嘅高級手工藝品。鎌倉彫中特別受歡迎嘅係可以用好耐嘅日常用品，例如有食用器具、鏡、原子筆等。想買鎌倉彫嘅話，可以去「陽雅堂」、「慶」、「一翠堂」等店鋪。
Comments