位於神奈川縣嘅小田原城係一座極具歷史價值嘅城堡，以天守閣作為城堡一大象徵而為人熟悉。因其復原力之高加上歷史背景，更令城堡成功擠身日本100名城之一！
關於小田原城
小田原城於15世紀中期左右建成，係日本最大嘅土造城堡。小田原城最外側城牆全長達9公里，由於以土牆同護城河構成堅固外牆，因此防禦力極高，更有「難攻不落之城」之稱。其後，小田原城雖因廢城而被解體，但就喺1960年過後被重建，成功重現過往風貌。現時嘅小田原城腹地內一帶開放小田原城址公園，仲有茶屋同商店等完善設施。
小田原城推薦必睇之處
小田原城嘅推薦之處係天守閣、常盤木門、馬出門、銅門等成功復原嘅城堡一部分。此外，隨著唔同季節，小田原城址公園內仲有櫻花、繡球花、花菖蒲等唔同花卉盛開，為城堡增添美感。
天守閣
天守閣係嚟到小田原城觀光必睇推薦景點。建築物高約38米，驟眼睇上去係一座3層樓建築，但其實1樓分為2個部分，實際係4層高！內部係展示空間，可以參觀學習有關於小田原城嘅歷史，從最頂樓嘅展望台則可以飽覽小田原市街及相模灣景色。
常盤木門
常盤木門係小田原城嘅正門。與其他城門相比，木門一大特徵係建造得更加堅固。城門與建築物被設計成共同一體，並兼具武器庫及監視哨所功能。2層樓高嘅建築物內，1樓提供盔甲和服試穿體驗，推薦遊客可以喺城內各個景點影相留念。2樓則係2016年開幕嘅「SAMURAI館（武士館）」，館內展出咗盔甲及刀劍等武器，以及重現日本武士世界觀嘅投影SHOW。
小田原城營業時間・門票費用
小田原城營業時間因設施而異。天守閣及常盤木門營業時間基本上為朝早9點至下午5點。天守閣於祭典舉辦期間、夏季同黃金週期間會延長開放至夜晚7點。
入場門票費用為天守閣500円、常盤木門200円。購買2項設施共通門票則係600円，比分開買平100円。（資訊截止2019年4月）
前往小田原城嘅交通方式
小田原城距離JR小田原站徒步約10分鐘。要前往小田原站，從神奈川出發的話可從橫濱站，從東京出發的話則建議從東京站搭車。無論係橫濱站或東京站，都可乘搭JR東海道線，唔使轉車即可直達。從橫濱站到小田原站約1小時、從東京站出發則約1小時20分鐘。
景點資訊
- 名稱：小田原城
- 地址：〒250-0014 神奈川縣小田原市城内6-1
- 交通方式：距離JR小田原站徒步約10分鐘
- Wi-Fi：提供
- 語言：可用英文溝通
- 門票：於入口處購買
- 信用卡：無法使用
Comments