箱根神社擁有1250年以上歴史嘅日本神社

箱根神社擁有1250年以上嘅歴史，係箱根具代表性嘅觀光景點。芦之湖映入眼簾，被箱根山環抱，大自然豐富嘅立地為魅力所在。

關於箱根神社

箱根神社自古以來作為山岳信仰嘅聖地而聞名。勝負運、交通安全、開運、結緣等等各式各樣嘅轉運開運、吸引眾人前往參拜祈願。另外，同箱根神社有關聯嘅神社有九頭龍神社、箱根元宮等，夾埋一次過參拜係大受好評嘅觀光路線。

箱根神社院內廣闊，而且有多個能量點。首先，先行過上有去厄運功效嘅89階梯級後到正殿參拜。參拜完後於神社院內悠閒散步都唔錯呀。另外，箱根神社內可以買到祈求各種運氣嘅御守，不妨買個帶返去做手信都好喎。

平和鳥居係建於蘆之湖邊嘅鳥居。鮮艷嘅紅色鳥居聳立於湖面嘅姿態非常美麗，係影相打卡嘅人氣觀光景點。沿著直伸到湖面嘅散步道，可更近距離欣賞蘆之湖美景啊。

「安産杉」及「矢立杉」作為御神木（靈樹）而被崇拜。樹齡超過1200年嘅巨大杉樹，其美麗令人歎為觀止。據聞平安時代嘅武將前來許願而願望得以實現，從此前來祈願安產及勝利嘅人紛紛而來。

由於九頭龍神社新宮嘅本宮離箱根神社遠，為方便大家參拜，於箱根神社院內建立新宮。呢度祭祀咗蘆之湖嘅守護神「九頭龍大神」，可以祈求開運、財運、投資、結緣等運氣。另外，從箱根神社至九頭龍神社本宮徒歩大約需要1個鐘，有充裕時間嘅話不妨試行吓啦。

箱根元宮為箱根神社入面嘅奥宮。位於標高超過1,300米嘅駒岳山頂，嚟呢度可以祈求願望成真、戀愛成就嘅福運。天氣好嘅話仲可以眺望到富士山，係可以飽覽宏偉景色嘅人氣觀光景點。可以乘搭「箱根駒岳空中纜車」7分鐘就可以去到山頂。

從東京出發嘅話，可以從東京站乘搭新幹線，或從新宿站乘搭小田急浪漫特快車抵達「JR小田原站」，交通較為簡單快捷。然後於JR小田原駅乘搭伊豆箱根巴士或箱根登山巴士，約1個鐘就可以去到最近嘅車站「元箱根」。另外，巴士站至箱根神社徒歩約10分鐘即可抵達。