神奈川：關東數一數二嘅人氣觀光地點

神奈川縣係關東最好嘅旅遊區之一。縣內嘅橫濱、鎌倉、箱根、湘南等地區有豐富嘅觀光景點。神奈川位於東京嘅南方，從東京市中心出發，約30分鐘至1個鐘就可以到達，交通非常方便。

關於神奈川

神奈川縣位於關東地區嘅南部。東面向太平洋，西有箱根、丹澤山脈，自然景觀豐富。另一方面，旅遊景點豐富，有日本代表性嘅貿易港口，關東數一數二嘅溫泉鄉，仲有優美嘅城市景觀。此外，神奈川縣內各地區嘅旅遊看點同美食都各有特色。

神奈川沖浪裏

《神奈川沖浪裏》係日本浮世繪畫家葛飾北齋嘅著名版畫作品。畫面由波濤洶湧嘅海浪、三艘船同作為背景嘅富士山所構成。據聞畫中風景係從現今嘅橫濱本牧沖所眺望嘅景色。本牧地區距離橫濱中華街比較近，係一個著名嘅釣魚場所。

神奈川旅遊看點

神奈川縣觀光大致分為三個區域。首先係「橫濱地區」。呢個係一個都市型觀光區，以橫濱港為中心、充滿濃厚嘅異國情調。主要景點有橫濱中華街、橫濱紅磚倉庫，仲有「橫濱港未來21」地區內嘅眾多商業設施。第二個係「鎌倉、湘南、江之島地區」。可以享受海水浴場、衝浪、購物等活動。此外，鎌倉仲有大佛、鶴岡八幡宮同長谷寺等著名嘅寺廟及神社。第三個係「箱根地區」，係日本屈指可數嘅溫泉鄉。

神奈川嘅美食餐廳

神奈川縣各區域美食各有特色，豐富又多樣。面向太平洋嘅沿海地區，可以品嚐到新鮮嘅魚類同貝類海產。「吻仔魚丼飯」同「吞拿魚丼飯」非常出名。神奈川縣嘅行政及經濟中心「橫濱」，知名美食代表為豚骨醬油湯底嘅「橫濱拉麵」同「崎陽軒燒賣」。於溫泉之鄉嘅箱根，溫泉「黑蛋」同蕎麥麵都係必食美食。

神奈川嘅酒店

神奈川嘅住宿設施集中喺橫濱站等主要車站周圍，每個旅遊區都有酒店同日式旅館。如果追求方便，最好選擇車站附近嘅酒店。

各區酒店嘅選擇建議：橫濱地區的話，可以揀選可以眺望橫濱市、港口景色嘅酒店；鎌倉、江之島地區的話，選擇評價又舒適嘅民宿或青年旅館；箱根地區的話，則係推薦溫泉旅館。

從東京抵達神奈川嘅交通方式

如果想前往神奈川縣觀光，首先需要前往「橫濱站」。從東京站乘搭JR東海道線前往橫濱站約需26分鐘。於橫濱觀光後，可以前往神奈川縣其他地區。

從東京前往箱根，建議從新宿站乘搭小田急「浪漫特快列車」，係最簡單又快速嘅方法。

相關資訊

• 名稱：橫濱（橫濱站）
• 地址：神奈川縣橫濱市西區高島
• 交通方式：從JR東京站乘搭JR京濱東北線約37分鐘
• Wi-Fi：有
• 各國語言對應：英文（橫濱站旅遊諮詢處）
• 購票方式：各車站
• 接受信用卡：VISA、MasterCard、JCB、AMERICAN EXPRESS、Diners Club International