神奈川縣嘅箱根地區內，有可以眺望火山地形嘅群山。其中之一就係駒岳。乘搭通往山頂嘅空中纜車可以一覽箱根景色，駿河灣及富士山等等美景盡收眼簾，非常推薦。乘搭駒岳空中纜車大約7分鐘就可以輕輕鬆鬆抵達山頂。
去搭駒岳空中纜車向駒岳山頂出發！
駒岳係位於箱根，海拔1,357米高嘅山岳。從駒岳嘅山頂，可以飽覽蘆之湖全景、駿河灣及富士山等風景。尤其係夕陽映照下嘅富士山更加係令人歎為觀止嘅美景。乘搭駒岳空中纜車就可以輕鬆抵達山頂。除咗景觀，仲可以觀賞到稀有嘅高山植物，色彩絢麗嘅花卉。仲可以去參拜一下建於駒岳山頂上，自古以來被人們信奉嘅神社。由於登山徑路段於2019年4月現時封閉中，想出發前往山頂嘅話請使用空中纜車。
箱根駒岳空中纜車嘅特色
箱根駒岳空中纜車係連接位於蘆之湖嘅箱根園站至駒岳山頂站，全長1,783米嘅纜車。於1963年開通，係抵達駒岳山頂唯一嘅交通工具。從湖畔至山頂需時大約7分鐘。可以喺空中散歩嘅同時欣賞沿途美麗嘅景色。山頂有可以眺望箱根嘅展望廣場，可以一覽富士山以及駿河灣甚至係伊豆半島嘅美景。一年四季都可以欣賞罕有嘅高山植物。另外，仲可以喺山頂嘅箱根神社元宮悠閒散步。其中仲會舉辦期間限定嘅夜間觀星活動，時機合適嘅話，不妨嚟呢度感受一下滿天星星嘅箱根夜空啦！
駒岳空中纜車的使用指南
駒岳空中纜車嘅車票僅提供來回套票（2019年４月資訊），來回車費為大人1,600円，小童800円。運行時間方面為每個鐘頭嘅00分、20分、40分，每20分鐘一班，從上午9時至下午4時30分（下山最終班次為下午4時50分）。人多時會加開臨時班次。運行所需時間為單程約7分鐘。若遇強風或雷電等天氣惡劣情況時，基於安全問題而可能會停止運行。
點去搭駒岳空中纜車呢？
想去搭駒岳空中纜車，從「小田原站」乘搭伊豆箱根巴士（約80分鐘車站），於「箱根園」落車。
景點資訊
- 景點名稱：駒岳空中纜車
- 地址：神奈川縣足柄下郡箱根町元箱根１３９
- 交通方式：從小田原站乘搭伊豆箱根巴士至箱根園（約80分鐘車程）
- Wi-Fi :不提供
- 對應語言：僅限日文
- 購票方式：於各車站
- 可否使用信用卡：不支援信用卡
Comments